Африкада COVID-19 билан касалланиш оқибатидаги ўлимлар ўтган ҳафтага нисбатан 72 фоизга ошди. Бу ҳақда Жаҳон соғлиқни сақлаш ташкилотининг (ЖССТ) коронавирус бўйича ҳафталик ҳисоботига таяниб, «Коммерсантъ» хабар берди. Ўтган ҳафта бутун дунёда коронавирусдан жами 44,6 мингга яқин ўлим қайд этилган.
ЖССТ ҳисоботига кўра, дунё миқёсида COVID-19 инфекциясидан ўлим даражаси ўтган ҳафтага нисбатан 4 фоизга камайди. Ўлим кўрсаткичининг ўсиши Жануби-Шарқий Осиёда (9 фоизга) ва Америка қитъасида (7 фоизга) ҳам қайд этилган.
Польшада 28 декабрь куни COVID-19 дан вафот этганлар сони бўйича антирекорд қайд этилди. Мамлакатда бир суткада 794 нафар коронавирусга чалинган бемор вафот этган. Шунингдек, ўтган кун давомида яна 15,5 мингдан ортиқ кишида коронавирус аниқланган.
Польша ҳукуматининг эпидемиологик масалалар бўйича маслаҳатчиси Анжей Хорбан мамлакатда тез орада коронавирус «цунамиси» юз беришини ва касалхонага ётқизилганлар сони 1 миллионга етишини айтган.
28 декабрь куни Аргентинада бутун пандемия давридаги кунлик касалланишларнинг максимал кўрсаткичи қайд этилди — 33,9 кишида коронавирус аниқланди. Мамлакатда сўнгги 24 соат ичида 20 киши инфекция оқибатида вафот этди.
Аргентинада касалланиш декабрь ойининг ўрталаридан бери ортиб бормоқда. Мамлакат аҳолисининг 78 фоизи тўлиқ эмланган, бу Лотин Америкасидаги энг юқори кўрсаткичлардан бири.
27 декабрь куни бутун дунёда рекорд даражада кўп одамда — 1,44 миллиондан ортиқ кишида COVID-19 аниқланган эди. Сўнгги етти кунлик касалланишларнинг ўртача даражаси ҳам рекорд бўлган — 841 минг атрофида. Бу бир ой олдин «омикрон» штамми биринчи марта аниқланган вақтга нисбатан 49 фоизга юқори.
Bloomberg сўнгги тадқиқотларга таяниб маълум қилишича, «омикрон» аввалги штаммларга қараганда 70 марта тезроқ юқади, лекин у келтириб чиқарадиган касаллик, айниқса, одам коронавирусга қарши эмланган ёки бустер доза олган бўлса, енгилроқ ўтади. Шу билан бирга жанубий африкалик олимлар Pfizer вакцинаси «омикрон» штаммига қарши самарасиз эканини аниқлаганди.
Коронавируснинг янги «омикрон» штамми биринчи марта 11 ноябрь куни Жанубий Африкада топилган. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.
Аввалроқ Туркияда коронавирус билан касалланганлар сони рекорд даражада ошгани, Бельгияда «омикрон» штамми туфайли янги чекловлар амалга киритилгани, Нидерландия ҳукумати «омикрон» штамми тарқалиши туфайли Европа Иттифоқи мамлакатлари орасида биринчи бўлиб локдаун жорий қилгани ҳақида хабарлар берилганди.
Изоҳ (0)