Ukraina prezidenti Vladimir Zelenskiy mamlakatning axborot xavfsizligi strategiyasini tasdiqladi. Ushbu strategiya boshqa narsalar qatori axborot sohasida Rossiyaga qarshi turishga qaratilgan, deb xabar beradi “TASS”. Bu boradagi tegishli qaror davlat rahbari ofisining rasmiy saytida e’lon qilingan.
“Axborot xavfsizligi to‘g‘risidagi strategiya tasdiqlansin”, — deyiladi qaror matnida. Hujjat e’lon qilingan kunidan boshlab kuchga kiradi.
Strategiya axborot sohasidagi Ukrainaning milliy xavfsizligiga tahdid va chaqiriqlarni belgilaydi, ular orasida Rossiyaning axborot siyosati ham ko‘rsatilgan.
15-sentabr kuni Ukraina hukumati prezident tomonidan 2020-yil sentabrida imzolangan milliy xavfsizlik strategiyasi asosida ishlab chiqilgan axborot xavfsizligi strategiyasini tasdiqlagan. Uning maqsadi Ukrainada axborot xavfsizligini ta’minlash, axborot sohasidagi davlat xavfsizligiga tahdidlarga qarshi kurashish, shaxslarning ma’lumotlarga bo‘lgan huquqlarini himoya qilish va shaxsiy ma’lumotlarni himoya qilish asoslarini aniqlashdan iborat.
Strategiya Ukrainaning konstitutsiyaviy tuzumi va hududiy yaxlitligini ag‘darish, uning suvereniteti va demokratik tizimiga putur yetkazishga qaratilgan axborot tajovuzkorligini cheklash orqali amalga oshiriladi.
Eslatib o‘tamiz, 2021-yilning avgust oxirida Ukraina prezidenti Vladimir Zelenskiy Milliy xavfsizlik va mudofaa kengashi (MXMK)ning mamlakat kibermudofaasi bo‘yicha shoshilinch choralar to‘g‘risidagi qarorini kuchga kiritgandi. Hujjatga muvofiq, Zelenskiy hukumatga ikki oy ichida Ukraina Mudofaa vazirligi tizimida faoliyat ko‘rsatadigan kiberqo‘shinlarni yaratish to‘g‘risidagi qonun loyihasini ishlab chiqishni va ko‘rib chiqish uchun Oliy Radaga kiritishni buyurgan.
Izoh (0)