O‘zbekistonda yangi ko‘rinishdagi 50 ming va 100 ming so‘mlik banknotalar muomalaga chiqarildi (foto)

O‘zbekistonda 27-dekabrdan boshlab yangi 50 ming va 100 ming so‘mlik kupyuralar muomalaga chiqarildi.

Dekabr boshida O‘zbekistonda yangi ko‘rinishdagi 50 ming va 100 ming so‘mlik banknotalar chiqarilishi to‘g‘risida xabar berilgandi. 16-dekabr kuni Markaziy bank yangi ko‘rinishdagi nominal qiymati 50 ming so‘m va 100 ming so‘m bo‘lgan banknotalar dizaynini e’lon qildi. O‘shanda yangi banknotlar 22-dekabrdan muomalaga chiqishi ma’lum qilingandi.

Biroq 17-dekabr kuni ijtimoiy tarmoqlarda yangi 50 ming so‘mlik banknota dizaynida xatolikka yo‘l qo‘yilgani to‘g‘risida xabarlar tarqaldi va Markaziy bank xatolikka yo‘l qo‘yilganini tan oldi. Ya’ni banknot namunasining old tomonida “Al-Hakim at-Termiziy” maqbarasi tasviri tushirilgan, ammo maqbara nomi “Abu Iso at-Termiziy” deb yozilgan edi.

Ma’lumot uchun, hozirgi vaqtda o‘zbek so‘mining eng katta qiymatli kupyurasi 100 000 so‘m hisoblanadi. Mazkur kupyura 2019-yil 25-fevraldan muomalaga chiqarilgan.

Eslatib o‘tamiz, O‘zbekistonda 2021-yilning 14-iyunidan boshlab nominal qiymati 2 000 so‘m va 20 000 so‘m bo‘lgan banknota ko‘rinishidagi yangi pul belgilari muomalaga chiqarilgandi. 2021-yilning 26-avgustidan boshlab esa O‘zbekistonda 5 ming va 10 ming so‘mlik banknotalar yangi ko‘rinishda muomalaga chiqarilishini boshlagan edi. O‘shanda Markaziy bank vakili 5 ming va 10 ming so‘mlik banknotalar yangi ko‘rinishda chiqarilishiga banknotlarni yagona tematikaga birlashtirish maqsadi ham sabab bo‘lganini aytib o‘tgandi.