Namanganda Matbuot uyi mukammal ta’mirlanadi, mahalliy teleradiokompaniya esa megastudiyaga ega bo‘ladi

Namangan viloyati hokimi Shavkat Abdurazzoqov mahalliy OAVga tegishli binolarda bo‘lib, ularning bugungi holati bilan tanishdi. Bu haqda “Daryo” muxbiri Azizbek Abduvaliyev xabar bermoqda.

Viloyat teleradiokompaniyasi binosi prezidentning Namanganga tashrifidan so‘ng investitsiya dasturiga kiritilgan va kapital ta’mirlash ishlari boshlangan edi. Birinchi bosqich uchun 9,3 milliard so‘mdan ortiq mablag‘ ajratildi.

Bu mablag‘ evaziga radio uyi, telemarkazning bir qismi ta’mirlanib, 450 kvadrat metr maydonga ega yangi megastudiya barpo etilmoqda.

Ikkinchi bosqichda telemarkaz ta’mirini yakuniga yetkazish hamda eng zamonaviy qurilma va jihozlar keltirilishi ko‘zda tutilgan.

Shavkat Abdurazzoqov teleradiokompaniyadagi qurilish ishlarini jadallashtirish va binoga tutash hududni obodonlashtirish yuzasidan o‘z tavsiyalarini berdi.

Namangan shahri markazida joylashgan Matbuot uyi qurilganiga 40 yildan oshdi. Bu yerda viloyat hokimligining “Namangan haqiqati” va “Namanganskaya pravda” gazetalari, shuningdek, yana o‘nlab nashrlar tahririyatlari joylashgan. Bino o‘tgan vaqt mobaynida biror marotaba mukammal ta’mirlanmagan edi.

Shavkat Abdurazzoqov Matbuot uyiga ham bordi va u yerdagi ahvol bilan tanishdi.

Hokim Matbuot uyida 2022-yilning yanvar oyidan kapital ta’mirlash ishlarining boshlanishini aytdi. Kelgusi yili zamonaviy ta’mirlangan va barcha sharoitlarga ega bino jurnalistlar uchun foydalanishga topshiriladi.