O‘zbekiston 2021-yilning 1—20-dekabr kunlari 60,4 ming tonna kartoshka import qilgan. Bu haqda Iqtisodiy taraqqiyot va kambag‘allikni qisqartirish vazirligi ma’lumotlariga tayanib, EastFruit xabar berdi.
Tahlilchilarning baholashicha, ushbu mahsulot importi hajmi 2021-yilning 1-yanvaridan 20-dekabriga qadar 516,2 ming tonnani tashkil etgan. Bu butun 2020-yil davomidagi importdan 23 foizga ko‘p demak. Shu bilan birga, respublika hukumati importga bog‘liqlikni kamaytirish maqsadida 2022-yilda kartoshka ekiladigan maydonlar sonini keskin oshirishni rejalashtirmoqda.
Bundan oldingi rekord 2020-yilda qayd etilgan: O‘zbekiston o‘tgan yili 421 ming tonna kartoshka import qilgan — bu undan oldingi yildagi ko‘rsatkichga nisbatan qariyb 1,5 barobarga ko‘p. 2016-yilga qadar mamlakatda kartoshka importi yiliga 50 ming tonnadan oshmagan, 2017-yilda esa mazkur mahsulot importi 194 ming tonnaga chiqib ketgan. 2017-yildan 2021-yilga qadar mos ravishda import hajmi 2,7 barobarga oshgan.
Qishloq xo‘jaligi vazirligi 2022-yilda respublikada 122 ming gektar maydonga kartoshka ekilishini ma’lum qilgan, bu 2021-yilga nisbatan 40 foizga ko‘p.
Eslatib o‘tamiz, 2021-yilning fevralida prezident Shavkat Mirziyoyev Namangan viloyatiga tashrifi davomida qishloq xo‘jaligi sohasini rivojlantirishga oid bir qancha loyihalar bilan tanisharkan, O‘zbekistonda kartoshkachilik yo‘nalishiga katta ahamiyat qaratish zarurligini qayd etgandi. “O‘zbekiston sharoitida yerdan samarali foydalanishimiz kerak. Qaysi hududga qanday navdagi kartoshka ekish bo‘yicha tajribamiz yetarli emas. Ilmiy yondashuv yo‘qligi bois kartoshkani ham ko‘ngildagidek yetishtira olmayapmiz”, — degan edi davlat rahbari.
Izoh (0)