Prezident Shavkat Mirziyoyev 22-dekabr kuni vazirlik va idoralarga ajratiladigan mablag‘larning miqdorini 2,22 trillion so‘mga (qariyb 205,4 million dollar) oshirish to‘g‘risidagi qonunni imzoladi, deb xabar beradi “Gazeta.uz”.
Avvalroq moliya vaziri o‘rinbosari Ahadbek Haydarov prezident va hukumatning ta’lim, sog‘liqni saqlash va qishloq xo‘jaligini qo‘llab-quvvatlash, ichimlik suvi ta’minotini yaxshilash, eksportni rag‘batlantirish hamda boshqa “muhim chora-tadbirlar to‘g‘risida”gi qarorlari doirasida davlat budjeti xarajatlarini yana 2,2 trillion so‘mga oshirish rejalashtirilganini ma’lum qilgandi.
Xususan:
- “Tashabbusli budjet” doirasida tuman va shaharlarda fuqarolarning tashabbuslarini moliyalashtirishga — 117 milliard so‘m;
- davlatga g‘alla sotuvchi fermer va g‘allachilik klasterlariga har bir tonna uchun 350 ming so‘mdan — jami 800 milliard so‘m miqdorida subsidiya ajratiladi;
- Mo‘ynoq tumanidagi 5 kishigacha a’zosi bo‘lgan har bir oilaga 5 million so‘mdan bir martalik yordam hamda Qoraqalpog‘istondagi 21 ta ijtimoiy-iqtisodiy muammoli mahallani obodonlashtirishga 67 milliard so‘m;
- Surxondaryo viloyati aholisini ichimlik suvi bilan ta’minlash loyihasi uchun (To‘palang suv omboridan magistral suv quvurini qurish, loyiha To‘palang HPD Platinum kompaniyasi tomonidan amalga oshirilmoqda) 200 milliard so‘m, Rossiyadan quvurlar sotib olish uchun Tiklanish jamg‘armasi hisobidan 327 milliard so‘m — jami 527 milliard so‘m. Ahadbek Haydarovning aniqlik kiritishicha, pul quvurlar narxi oshishidan oldin sotib olish uchun ajratilmoqda;
- ijtimoiy infratuzilmani yaxshilash uchun Sirdaryo, Jizzax va Navoiy viloyatlariga 100 milliard so‘mdan (jami 300 milliard so‘m), shuningdek, Toshkent shahriga 200 milliard so‘m — jami 500 milliard so‘m;
- davlat va jamoat ehtiyojlari uchun olib qo‘yilgan yer uchastkalari uchun kompensatsiya to‘lash uchun — 50 milliard so‘m. Yil boshida bu maqsadlar uchun 150 milliard so‘m, keyinroq yana 123 milliard so‘m yo‘naltirildi. Moliya vaziri o‘rinbosari hududlarda aholi va ishbilarmonlardan buzilishlar bo‘yicha to‘lanmagan qarzlar qolayotganini ta’kidlagan.
113 milliard so‘m Moliya vazirligi, Davlat xavfsizligi xizmati va boshqa huquq-tartibot organlari kiruvchi tashkilotlarga ajratiladi, ammo aynan qaysi xarajatlar uchun ekanligiga aniqlik kiritilmagan. Qonunchilik palatasining joriy xarajatlari yil yakuniga ko‘ra 25,1 milliard so‘mga oshgan.
2021-yil uchun konsolidatsiyalangan budjet taqchilligining chegaraviy hajmi (davlat budjeti, davlat maqsadli jamg‘armalari, Tiklanish va taraqqiyot jamg‘armasi, shuningdek, tashqi qarzlar hisobga olingan holda davlat dasturlarini amalga oshirish bilan bog‘liq) YaIMga nisbatan 5,5 foizdan 6,5 foizgacha oshiriladi.
Qonunchilik palatasi 14-dekabr kuni qonun loyihasini birinchi o‘qishda ma’qullagan, biroq budjet va iqtisodiy islohotlar qo‘mitasi istisno tariqasida qonunni hujjatning har bir bandini muhokama qilmasdan, birdaniga ikkinchi va uchinchi o‘qishda qabul qilishni taklif qilgan. Shuningdek, 15-dekabr kuni o‘tkazilgan Senatning yalpi majlisida ham mazkur qonun ma’qullangan.
O‘zbekiston davlat budjeti xarajatlari bir yilda uchinchi marta oshirilmoqda. Prezident Shavkat Mirziyoyev 2-iyul kuni parlamentda 2021-yilgi davlat budjeti to‘g‘risidagi qonungа o‘zgartish va qo‘shimchalar ko‘rib chiqilgach, vazirlik va idoralarga ajratiladigan mablag‘larning maksimal miqdorini avvaliga 13,1 trillion so‘mga (1,2 milliard dollar) — 135,8 trillion so‘mdan 148,9 trillion so‘mgacha, 6-noyabrda esa 11,69 trillion so‘mga (Markaziy bankning 10 noyabrdagi kursi bo‘yicha 1,09 milliard dollar) yoki 148,9 trillion so‘mdan 160,6 trillion so‘mgacha oshirish to‘g‘risidagi qonunni imzoladi.
Izoh (0)