Filippinda sodir bo‘lgan Rai tayfuni qurbonlari soni 300 kishidan oshdi. Bu haqda Xatarlarni kamaytirish va tabiiy ofatlar oqibatlarini bartaraf etish milliy kengashiga (NDRRMC) tayanib, “RIA Novosti” xabar berdi.
Avvalroq Filippinda yuz bergan Rai tayfuni qurbonlarining soni 239 kishiga yetgani, 52 kishi bedarak yo‘qolgani to‘g‘risida xabar berilgandi. O‘z navbatida, Filippin hukumati 156 kishi halok bo‘lgani haqida aytmoqda. Ularning ma’lumotlariga ko‘ra, 275 kishi jarohat olgan, yana 37 kishi bedarak yo‘qolgan.
“Juma kuni, Rojdestvodan bir kun oldin NDRRMC tayfun qurbonlari soni 326 kishiga yetganini ma’lum qildi. 661 kishi jarohat olgan, 58 kishi bedarak yo‘qolgan deb hisoblanmoqda”, — deyiladi CNN Philippines telekanali ma’lumotida.
Rai tayfuni Filippin qirg‘oqlariga 16-dekabr payshanba kuni yetib kelgandi. O‘n minglab aholi maktab va hukumat binolarida joylashgan xavfsiz hududlarga evakuatsiya qilingan. Ayrim odamlarni majburan evakuatsiya qilishga to‘g‘ri kelgan.
Ba’zi joylarda shamol tezligi soatiga 185 kilometrga yetgan, maksimal tezlik soatiga 195 kilometrni tashkil etgan. Mahalliy hokimiyat organlari yomon ob-havo tufayli yo‘llar va ko‘priklarga yetkazilgan zararni taxminan 178,4 million Filippin pesosiga (3,56 million dollar) baholadi.
Eslatib o‘tamiz, Filippinda aprel oyida Surigay tayfuni sodir bo‘lib, 60 ming kishi evakuatsiya qilingandi. O‘shanda shamol tezligi 195 kilometr soatga yetib, uylarning tomini vayron qilgan va daraxtlarni qo‘porib tashlagan.
Izoh (0)