Россия президент ишлари бошқармаси Владимир Путиннинг 23 декабрь куни Манежда бўлиб ўтган йирик матбуот анжуманини ташкиллаштириш учун 117 миллион рубль (1,5 млн доллар), жумладан, журналистларни кумуш кукуни билан дезинфекция қилишга қарийб бир ярим миллион рубль (19 минг доллар) сарфлаган. Бу ҳақда давлат харидлари материалларига таяниб, Daily Storm хабар берди.
Қайд этилишича, президент бошқармаси «Кумуш ниқоб» савдо белгисининг DEZ GАТЕ серияли (DG-7.2 модели) олтита дезинфекция кабинасини икки кунлик ижарага олиш учун 1 миллион 399 минг рубль сарфлаган. Кумуш зарралари билан дезинфекция қилиш учун «Аквивон-Эко» воситасидан фойдаланилган.
Ишлаб чиқарувчи «Стерил» компаниясининг веб-сайтида айтилишича, дезинфекция кабиналари «инсон териси, кийим-кечак, пойабзал ва бошқа нарсаларни самарали тозалаш учун мўлжалланган». Компанияда таъкидланишича, «самарадорлик ва хавфсизлик ‘Роспотребнадзор’ томонидан тасдиқланган».
«Аквивон-Эко» воситасининг қўллашдан олдинги йўриқномасида унинг «кумуш катионлари концентрати асосида» яратилгани ва «экологик жиҳатдан тоза, заҳарли бўлмаган ҳамда инсонлар учун зарарсиз экани айтилади».
Президент ишлари бошқармасининг матбуот котиби Елена Крилова Путиннинг матбуот анжумани олдидан кумуш кукуни билан дезинфекция қилиш «мутлақо хавфсиз» ва «ҳатто фойдали» эканини маълум қилган.
Meduza’нинг тиббиёт бўйича муҳаррири Дариа Саркисян Манеждаги мазкур шаклдаги дезинфекция ҳақида фикр билдирар экан, тиббиёт ёки соғлиқни сақлаш ташкилотларининг кумушдан бундай усулда дезинфекция учун фойдаланишни таклиф қилувчи бирорта расмий тавсияси йўқлигини айтган.
Владимир Путиннинг катта матбуот анжуманидан ташқари, DEZ GАТЕ серияли кабиналар Реутов шаҳри маъмуриятида, Россия Федерацияси Ташқи ишлар вазирлиги ҳузуридаги Дипломатик академияда, шунингдек, Санкт-Петербургнинг Невский тумани шаҳар поликлиникасида ишлатилган.
Изоҳ (0)