Bloomberg: Rossiya Ukraina chegaralari yaqinida qo‘shin to‘plashda davom etmoqda

Rossiya Ukraina bilan chegara yaqinida harbiy texnika va qo‘shinlarini to‘plashda davom etmoqda. Bu haqda Janes harbiy razvedka kompaniyasi tomonidan o‘rganilgan sun’iy yo‘ldosh tasvirlariga tayanib, Bloomberg xabar berdi.

Bloomberg xabariga ko‘ra, noyabr oyining boshidan beri chegara hududlariga tanklar, artilleriya qurollari va havo hujumidan mudofaa tizimlari ko‘chirib kelingan. Chegarada qo‘shinlar soni cheklangan bo‘lsa-da, Rossiya poyezd va samolyotlarda katta qo‘shinlarni jo‘natib, qurolli kuchlarini tezda yig‘ishi mumkin, deydi Janes vakillari.

Ukraina harbiylarining ma’lumotlariga ko‘ra, Moskva allaqachon 122 ming harbiyni Ukraina bilan chegaradan 200 kilometr uzoqlikda joylashtirgan.

Rossiya qo‘shinlarining Ukraina bilan chegarada to‘planayotgani haqida ma’lumotlar 2021-yilning kuzida paydo bo‘lishni boshladi. G‘arb OAV manbalariga ko‘ra, Ukrainaga hujumda 100-175 ming rossiyalik askar ishtirok etishi mumkin. Kreml bu xabarlarni “quruq, asossiz holda keskinlikni kuchaytirish” deb atadi.

Ukraina atrofidagi vaziyat 7-dekabr kuni Rossiya va AQSh prezidentlari Vladimir Putin va Jo Bayden o‘rtasidagi onlayn muzokaralarda muhokama qilingan edi. Bayden Putinni Rossiya Ukrainaga bostirib kirgan taqdirda “keskin iqtisodiy va boshqa choralar” haqida ogohlantirgan. Putin, o‘z navbatida, NATOni “Ukraina hududini bosib olishga bo‘lgan xavfli urinishlar”da ayblagan va alyansning sharqqa tomon kengayishi to‘xtatilishiga kafolat talab qilgan.

Bu orada Yevropada xavfsizlik kafolatlari bo‘yicha muzokaralar boshlandi. Rossiya Tashqi ishlar vazirligi AQSh va NATO bilan kelishuv loyihalarini e’lon qildi. Rossiya tomoni boshqa narsalar qatori NATOga Ukrainani alyansga qo‘shilishdan chetlashtirishni taklif qildi. AQSh Rossiyaning takliflarini ko‘rib chiqqanini, ammo Yevropa davlatlarining ishtirokisiz ularni muhokama qilmoqchi emasligini ma’lum qildi.