Belgiya hukumati 2025-yilga qadar mamlakatdagi barcha atom elektrostansiyalari yopilishini ma’lum qildi. Bu haqda Reuters agentligiga tayanib, Tengrinews xabar berdi.
Ayni vaqtda Belgiyada ikkita AES mavjud — Doel va Tixanjda joylashgan bo‘lib, ularning yettita atom reaktori bor. Belgiyadagi yadroviy muammoni qanday hal qilish bo‘yicha munozaralar hukumat tomonlarining keskin kelishmovchiligi bilan uzoq yillar davom etgan va 2021-yilda ushbu masalani hal etishning so‘nggi muddati belgilangan.
Muzokaralardan so‘ng vazirlar murosaga kelgan va unga ko‘ra mamlakatdagi mavjud so‘nggi atom elektrostansiya 2025-yilda yopilishi kerak. Yopilish ishlari 2022-yilda xavfsiz foydalanishdan chiqarish yo‘li orqali boshlanadi va 2045-yilda ikkala zavod ham buzib tashlanadi. Belgiyadagi yettita reaktorga ega ikkita atom stansiyasi Fransiyaning Engie kompaniyasi tomonidan boshqariladi va mamlakatda ishlab chiqariladigan elektr energiyasining qariyb yarmi ularning hisobiga to‘g‘ri keladi.
Kelishuvda hukumat energiya tanqisligini to‘ldirish uchun ikkita gaz elektrostansiya qurilishiga umid bildirgan. Hukumatning ma’lum qilishicha, reja mart oyida mavjud muammolarni hal etish maqsadida qayta ko‘rib chiqiladi. Bosh vazir Aleksandr De Krooning aytishicha, ushbu obyektlarda qurilgan yangi reaktorlar xavfsizlik tizimlari sifatida kengaytirilishi mumkin, ammo buning “ehtimoli juda kamligini” qo‘shimcha qilgan.
Mamlakat yadroviy texnologiyalardan butunlay voz kechmaydi, bitim doirasida 100 million yevro tadqiqotlarga, jumladan, kichik modulli atom elektrostansiyalari uchun yo‘naltiriladi.
Avvalroq Xitoyning “Tayshan” AESda radiatsiya darajasi oshgani, Lukashenko Belarusda ikkinchi AES qurishga ruxsat bergani, Fransiya, Polsha va yana besh mamlakat atom energetikasini yoqlab chiqqani to‘g‘risida xabar berilgandi.
Izoh (0)