Bangladeshdagi MV Abhijan-10 paromida sodir bo‘lgan yong‘in oqibatida kamida 30 kishi halok bo‘ldi. Yuzdan ortiq yo‘lovchi jarohat olgan. Bu haqda BNO News nashriga tayanib, “Korrespondent.net” xabar berdi. Ta’kidlanishicha, paromda jami 500 dan ortiq odam bo‘lgan.
Fojia 24-dekabr kuni soat 03:00 larda sodir bo‘lgan. Parom Jalokati tumanidagi Suganda daryosida yonib ketgan.
Ma’lum qilinishicha, kamida 70 kishi tuman shifoxonasiga yetkazilgan. Qutqaruvchilarning taxminicha, qurbonlar soni ortishi mumkin. Bedarak yo‘qolganlarning aniq soni ma’lum emas. Yong‘in nima sababdan yuzaga kelgani noma’lum.
Eslatib o‘tamiz, 2021-yilning avgustida Bangladesh sharqida 100 nafar yo‘lovchi bo‘lgan qayiq va qum ortilgan trauler (baliq ovlashga mo‘ljallangan kema) to‘qnashib ketgandi. Hodisa oqibatida kamida 21 kishi halok bo‘lgan.
Avvalroq Myanmada sodir bo‘lgan ko‘chki oqibatida 100 ga yaqin odam bedarak yo‘qolgani, Madagaskar yaqinida 100 dan ortiq yo‘lovchisi bor kema cho‘kib ketishi natijasida kamida 17 kishi halok bo‘lgani, Yaponiyadagi ko‘p qavatli binoda sodir bo‘lgan yong‘in oqibatida 27 kishi halok bo‘lgani to‘g‘risida xabar berilgandi.
Izoh (0)