Janubiy Koreya hukumati mamlakatning sobiq prezidenti Pak Kin Xeni afv etishga qaror qildi. Bu haqda Yonhap agentligiga tayanib, “RBK” xabar berdi.
Sobiq prezident yaqinlashib kelayotgan Yangi yil munosabati bilan afv etiladiganlar ro‘yxatiga kiritilgan. Bu kabi qaror 69 yoshli Pak Kin Xening salomatligi yomonlashgani sabab qabul qilingan. 2021-yilda u uch marta yelkasi va belidagi og‘riq sabab shifoxonaga yotqizilgan hamda operatsiya qilingan.
2018-yilda Pak Kin Xe davlat sirini oshkor etish, tamagirlik, vakolatini suiiste’mol qilish va pora olishda ayblanib, 24 yil muddatda ozodlikdan mahrum etilgan va unga nisbatan 18 milliard von (o‘sha vaqtdagi kurs bo‘yicha 17,5 million dollar) jarima belgilangan. Shundan so‘ng hukm qayta ko‘rib chiqilgan va 2021-yilning yanvarida mamlakat Oliy sudi sobiq davlat rahbariga nisbatan chiqarilgan 20 yillik qamoq jazosini o‘z kuchida qoldirgandi.
Pak Kin Xe 2017-yilda korrupsiya mojarosiga aloqadorligi sababli hokimiyatdan chetlashtirilgan. U do‘sti Chxve Sun Sil bilan til biriktirib, Samsung va Lotte kabi yirik kompaniyalarni Sun Sil nazorat qilgan ikkita jamg‘armaga 77,4 milliard von ajratishga majbur qilganlikda, shuningdek, 2018-yili Milliy razvedka xizmatidan 2,5 milliard vonni noqonuniy olganlikda ayblangan.
Eslatib o‘tamiz, Janubiy Koreyaning korrupsiyada ayblangan yana bir sobiq prezidenti Li Myon Bak 17 yilga qamalgan edi.
Izoh (0)