Filippinda yuz bergan Rai tayfuni qurbonlarining soni 239 kishiga yetdi, 52 kishi bedarak yo‘qolgan. 300 mingdan ortiq odam uylarini tark etgan. Bo‘ronli shamol tomlarni uchirib yuborgan, daraxtlarni qo‘porib, elektr uzatuvchi beton ustunlarni qulatgan. “Korrespondent.net” Filippindagi halokatli tayfun oqibatlarini aks ettiruvchi kadrlarni jamladi.
Rai tayfuni Tinch okeanining g‘arbiy qismida shakllangan. Tayfun Filippin qirg‘oqlariga 16-dekabr payshanba kuni yetib kelgandi. O‘n minglab aholi maktab va hukumat binolarida joylashgan xavfsiz hududlarga evakuatsiya qilingan. Ayrim odamlarni majburan evakuatsiya qilishga to‘g‘ri kelgan.
Ba’zi joylarda shamol tezligi soatiga 185 kilometrga yetgan, maksimal tezlik soatiga 195 kilometrni tashkil etgan. Mahalliy hokimiyat organlari yomon ob-havo tufayli yo‘llar va ko‘priklarga yetkazilgan zararni, taxminan, 178,4 million Filippin pesosiga (3,56 million dollar) baholagan.
19-dekabr kuni tabiiy ofat qurbonlari soni 75 kishiga yetgani aytilgandi. Keyinroq mahalliy Manila Bulletin gazetasi halok bo‘lganlar soni 169 nafarni tashkil etayotgani haqida yozdi. Eng ko‘p qurbonlar Markaziy Visayi viloyatida qayd etilgan.
Izoh (0)