Qozog‘iston prezidenti Qosim-Jo‘mart To‘qayevning qaroriga muvofiq, mamlakat sog‘liqni saqlash vaziri Aleksey Soy lavozimidan ozod etildi. Bu haqda Qozog‘iston prezidenti matbuot xizmatiga tayanib, “TASS” xabar berdi.
“Davlat rahbarining qaroriga ko‘ra, Soy Aleksey Vladimirovich Qozog‘iston sog‘liqni saqlash vaziri lavozimidan ozod etildi”, — deyiladi xabarda.
Uning nima sababdan ishdan olinganiga aniqlik kiritilmagan. 44 yoshli Soy 2020-yilning iyunidan boshlab Qozog‘iston sog‘liqni saqlash vaziri lavozimida ishlab kelayotgandi (u Yeljan Birtanov o‘rnini egallagan edi). Tayinlovga qadar Soy Qozog‘iston prezidenti Tibbiyot markazi ishlar boshqarmasi boshlig‘i, sog‘liqni saqlash vaziri o‘rinbosari lavozimlarida faoliyat yuritgan.
Qozog‘iston prezidentining matbuot kotibi Berik Uali o‘zining Facebook’dagi sahifasiga yozishicha, To‘qayev “sobiq sog‘liqni saqlash vaziri Aleksey Soyga faol xizmatlari uchun, ayniqsa, Qozog‘istonda koronavirus pandemiyasi tarqalishiga qarshi kurashdagi ishlariga minnatdorlik bildirgan”.
Sog‘liqni saqlash vazirligi matbuot xizmatining ma’lum qilishicha, Soy boshqa ishga o‘tgani munosabati bilan o‘z xohishiga ko‘ra, lavozimidan ketgan.
Eslatib o‘tamiz, Qozog‘iston koronavirusning yangi “omikron” shtammi sabab 3-dekabrdan boshlab Afrikaning bir nechta mamlakati va Gonkongdan keladigan fuqarolarning mamlakatga kirishini cheklagan. Shuningdek, COVID-19 ning yangi varianti aniqlangan boshqa mamlakat fuqarolarining kirish tartiblarini kuchaytirgan edi.
Izoh (0)