Tailandda ilk bor “omikron” shtammini mamlakat ichida yuqtirish holati qayd etildi

Tailand hukumati mamlakat ichida koronavirusning “omikron” shtammi bilan kasallangan birinchi bemor haqida xabar berdi. Bu Janubi-Sharqiy Osiyo davlatida yangi shtammni mahalliy yuqtirib olish bo‘yicha ilk holat, deb yozadi Reuters.

“Omikron” shtammi bilan kasallangan bemor ayol Tailand fuqarosi bo‘lib, u virusni asli kolumbiyalik bo‘lgan turmush o‘rtog‘idan yuqtirgan. Erkak ham noyabr oyida Nigeriyada bo‘lib qaytgan.

Tailand hukumati mamlakatga kelgan xorijliklarni majburiy karantinga olish imkoniyatini ko‘rib chiqmoqda. Agar shunday qaror qabul qilinsa, xorijlik sayohatchilar mehmonxonalarda karantinga olinadi hamda ular uchun COVID-19 ga qarshi emlanganlik sertifikatini ko‘rsatish majburiy etib belgilanadi.

Hozirda Tailandda “omikron” shtammi bilan kasallanish bo‘yicha 63 ta holat qayd etilgan. Ulardan bittasi mamlakat ichidagi ayolda, qolganlari chet eldan tashrif buyurgan kishilarda aniqlangan.

Avvalroq Niderlandiya hukumati “omikron” shtammi tarqalishi tufayli Yevropa Ittifoqi mamlakatlari orasida birinchi bo‘lib lokdaun joriy qilgandi. Shuningdek, Germaniya “omikron” shtammi tufayli britaniyaliklarning mamlakatga kirishini cheklagan. Aviakompaniyalarga 20-dekabr yarim tundan boshlab Britaniyadan Germaniyaga sayyohlarni tashish taqiqlangan.

Jahon sog‘liqni saqlash tashkiloti bosh direktori Tedros Gebreyesusning ma’lum qilishicha, “omikron” varianti oldingi shtammlardan ko‘ra tez tarqalmoqda va hozirda u dunyoning 77 mamlakatida qayd etilgan.

Eslatib o‘tamiz, koronavirusning yangi “omikron” shtammi birinchi marta 11-noyabr kuni Janubiy Afrika respublikasida aniqlangan. Britaniyalik olimlar yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkinligini ta’kidlagan. JSST mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi.

JAR hukumati kasallanish holatlari keskin ortayotgani fonida o‘lim holatlari “juda kichik” o‘sishni ko‘rsatayotganini qayd etgan. “Omikron” bilan kasallanganlarning 60 tadan bittasigina shifoxonaga yotqizilyapti, deya ma’lum qilgan JAR Sog‘liqni saqlash vazirligi.