Филиппинда юз берган Раи тайфуни қурбонларининг сони 239 кишига етди, 52 киши бедарак йўқолган. 300 мингдан ортиқ одам уйларини тарк этган. Бўронли шамол томларни учириб юборган, дарахтларни қўпориб, электр узатувчи бетон устунларни қулатган. «Korrespondent.net» Филиппиндаги ҳалокатли тайфун оқибатларини акс эттирувчи кадрларни жамлади.
Раи тайфуни Тинч океанининг ғарбий қисмида шаклланган. Тайфун Филиппин қирғоқларига 16 декабрь пайшанба куни етиб келганди. Ўн минглаб аҳоли мактаб ва ҳукумат биноларида жойлашган хавфсиз ҳудудларга эвакуация қилинган. Айрим одамларни мажбуран эвакуация қилишга тўғри келган.
Баъзи жойларда шамол тезлиги соатига 185 километрга етган, максимал тезлик соатига 195 километрни ташкил этган. Маҳаллий ҳокимият органлари ёмон об-ҳаво туфайли йўллар ва кўприкларга етказилган зарарни, тахминан, 178,4 миллион Филиппин песосига (3,56 миллион доллар) баҳолаган.
19 декабрь куни табиий офат қурбонлари сони 75 кишига етгани айтилганди. Кейинроқ маҳаллий Manila Bulletin газетаси ҳалок бўлганлар сони 169 нафарни ташкил этаётгани ҳақида ёзди. Энг кўп қурбонлар Марказий Висайи вилоятида қайд этилган.
Изоҳ (0)