USAID O‘zbekiston Sog‘liqni saqlash vazirligiga sil kasalligini aniqlash uchun 30 ta GeneXpert uskunasini sovg‘a qildi

AQSH Xalqaro taraqqiyot agentligi (USAID) O‘zbekistonga sil kasalligini tekshiruvchi 30 ta apparatni sovg‘a qildi, deya xabar qilmoqda AQShning O‘zbekistondagi elchixonasi.

Respublika ixtisoslashtirilgan ftiziatriya va pulmonologiya ilmiy-amaliy tibbiyot markazida bo‘lib o‘tgan tantanali marosimda USAID’ning O‘zbekistondagi missiyasi direktori Mikayela Meredit qiymati 381 ming dollarlik uskunalarni sog‘liqni saqlash vaziri o‘rinbosari Ulug‘bek Sobirovga tantanali ravishda topshirdi.

“Bugungi tadbir USAID va O‘zbekiston o‘rtasidagi mintaqada sog‘liqni saqlash xizmatlarini yaxshilash bo‘yicha davomiy hamkorlikning timsolidir. Biz O‘zbekiston hukumati sil kasalligini 2050-yilgacha yo‘q qilish majburiyatini o‘z zimmasiga olganini olqishlaymiz, bu qadam hukumatning 2021-2026-yillarga mo‘ljallangan tuberkulyoz kasalligiga qarshi yangi Milliy strategiyasida ko‘rsatilgan bo‘lib, 2025-yilgacha tuberkulyoz bilan kasallanish darajasini 50 foizga va kasallik tufayli o‘lim sonini 75 foizga kamaytirishdir. Birgalikda biz O‘zbekiston fuqarolarining salomatligi va farovonligini oshirishga erishamiz”, – dedi Mikayela Meredit.

Qayd etilishicha, USAID tomonidan taqdim etilgan GeneXpert uskunasi innovatsion texnologiyasi, molekulyar testlarni misli ko‘rilmagan tezlik va foydalanishda yengilligi bilan hamma uchun qulay keladi.

GeneXpert diagnostika usulida tuberkulyozni davolashda ko‘p ishlatiladigan antibiotiklardan biri – rifampitsinga tuberkulyoz mikobakteriyasining turg‘unligi aniqlanadi. Bu shifokorlarga ma’lum bemorni davolash uchun haqiqatan ham samarali dori vositasini tanlash imkonini beradi.

Ta’kidlanishicha, bugungi hadya chekka-chekkalarda joylashgan tuman laboratoriyalariga tuberkulyozga chalingan bemorlar bilan ishlash bo‘yicha xizmatlarini oshirish va aholining kasallikka qarshi zamonaviy, tezkor molekulyar testlardan foydalanish imkoniyatlarini sezilarli darajada kengaytirish imkonini beradi. Tuman laboratoriyalarini yangi GeneXpert apparatlari bilan jihozlash tuberkulyozni tezroq aniqlash imkoniyatiga yo‘l ochib beradi.