Urganch shahri markazida zamonaviy yerosti avtomobil yo‘li qurib bitkazildi. Bu haqda Xorazm viloyati hokimligi xabar berdi.
Shahardagi eng tirband al-Xorazmiy va Islom Karimov ko‘chalari hududida qurilgan tunnelning uzunligi 500 metr, kengligi 17 metrni tashkil etib, loyiha bo‘yicha soatiga 3200 ta avtomobilni o‘tkazish quvvatiga ega.
Yangi inshootning ochilish marosimida nuroniylar, yoshlar, davlat va jamoat tashkilotlari vakillari ishtirok etgan. Viloyat hokimi Farhod Ermanov barchani yerosti yo‘l o‘tkazgichi foydalanishga topshirilishi munosabati bilan tabriklagan.
Ta’kidlanishicha, bunday yerosti avtomobil yo‘li respublika viloyatlari ichida ilk bor Xorazmda bunyod etilgan. Mazkur yo‘l o‘tkazgichni barpo qilishda bosh pudratchi tashkilot “Ko‘prikqurilish tresti” UKning “14-Ko‘prikqurilish” otryadiga qarashli 140 ta maxsus texnika hamda 1 800 nafardan ziyod malakali muhandislar, quruvchi va ustalar mehnat qilgan.
“Ma’lumki, al-Xorazmiy va Islom Karimov ko‘chalari shahardagi eng tirband yo‘llardan bo‘lib, al-Xorazmiy ko‘chasida sutkasiga o‘rtacha 18 ming, Islom Karimov ko‘chasida 14 ming dona transport vositalari harakatlanadi. Yerosti yo‘li qurilishi natijasida ushbu chorrahadagi tirbandlik bartaraf etildi, yo‘l-transport hodisalarining oldi olinib, piyodalarning xavfsiz harakatlanishi ta’minlandi”, — deyiladi xabarda.
Shuningdek, mazkur tunnel orqali har kuni shahar ichi va shahar atrofi yo‘nalishlarida qatnaydigan 200 dan ortiq avtobus va mikroavtobuslar harakatlanadi, ushbu jamoat transportlarida o‘rtacha 30 ming nafar yo‘lovchiga xizmat ko‘rsatiladi.
Eslatib o‘tamiz, 2021-yilning yanvarida Urganch shahrining markaziy maydoni yangidan qurilishi to‘g‘risida xabar berilgandi. Maydon markazida 25 metrli Jaloliddin Manguberdi haykali o‘rnatilishi, maydon ostidan esa avtomobil tunneli o‘tkazilishi aytilgandi.
Izoh (0)