USAID O‘zbekiston maktablariga qiymati 10 mln dollarlik 385 mingta kitob taqdim etdi
AQSh Xalqaro taraqqiyot agentligi (USAID) 3-noyabr kuni Namangan va Sirdaryo viloyatlarining 208 ta umumta’lim maktablariga 385 ming dona darslik va o‘qituvchilar uchun qo‘llanmalarni taqdim etdi, deb xabar bermoqda agentlik matbuot xizmati.
Qayd etilishicha, kitoblar USAID’ning O‘zbekiston Xalq ta’limi vazirligi bilan hamkorlikda O‘zbekistonda maktab o‘quvchilarining ta’lim natijalarini yaxshilash maqsadida amalga oshirilayotgan pilot loyihasi doirasida topshirildi.
Cambridge University Press nashriyoti tomonidan ishlab chiqilgan 10 million dollar qiymatidagi ushbu o‘quv-metodik majmualar 5—11-sinflarda informatika va axborot texnologiyalari (IAT) hamda 1—11-sinflarda ingliz tili chet tili sifatida fanlarini o‘qitishni qo‘llab-quvvatlashga mo‘ljallangan.
Joriy o‘quv yilida dastlabki tajriba-sinov yakunlangach, kitoblar o‘qituvchilarning fikr-mulohazalari asosida qayta ko‘rib chiqiladi va Xalq ta’limi vazirligi tomonidan 2022/2023-o‘quv yilidan boshlab butun mamlakat bo‘ylab barcha maktablarga yetkazib berish uchun chop etiladi.
Buning natijasida O‘zbekistonda 6,5 million nafardan ziyod o‘quvchilar yuqori sifatli darsliklardan, o‘n minglab o‘qituvchilar esa yuqori sifatli qo‘llanmalardan foydalanish imkoniyatiga ega bo‘ladi.
“O‘qituvchilar uchun ushbu yuqori sifatli qo‘llanmalar va darsliklar O‘zbekistonning ta’lim tizimiga bilimli va iqtidorli hamda hayotda muvaffaqiyatga erishishga imkon beruvchi tanqidiy fikrlash, muammolarni hal qilish va amaliy ko‘nikmalarga ega bo‘lgan bitiruvchilarni yetishtirishga yordam beradi. Biz USAID bilan ushbu pilot dastur doirasida hamkorlik qilishdan xursandmiz. Mazkur dastur mamlakat bo‘ylab o‘quv-metodik majmualarni tarqatishga tayyorgarlik ko‘rish jarayonida yuqori sifatli materiallarning ta’lim jarayoniga ta’sirini baholash imkonini beradi”, — deydi Xalq ta’limi vazirligining Respublika ta’lim markazi direktori Shuhrat Sattorov.
Xabarda, shuningdek, USAID “O‘zbekistonda barkamollik uchun ta’lim dasturi” doirasida yangi o‘quv-metodik majmualarni O‘zbekiston konteksti nuqtayi nazaridan baholash, ko‘rib chiqish va moslashtirish bo‘yicha Respublika ta’lim markazi bilan yaqin hamkorlikda ishlagani ma’lum qilingan.
USAID ingliz tili chet tili sifatida va informatika va axborot texnologiyalari fanlarining 1000 nafardan ortiq o‘qituvchilariga yangi darsliklar va qo‘llanmalardan foydalanish hamda o‘quvchiga yo‘naltirilgan ta’lim strategiyalaridan foydalanish bo‘yicha treninglar tashkil etib, bu yo‘nalishda ularga yaqindan yordam bermoqda.
Eslatib o‘tamiz, 6-avgust kuni USAID O‘zbekiston Xalq ta’limi vazirligi uchun xalqaro nashriyotlar ishlab chiqqan ikkita turkum darsliklar uchun litsenziya olganini e’lon qilgandi.
Shu kuni USAID’ning O‘zbekistondagi missiyasi direktori Mikaela Meredit va xalq ta’limi vaziri Sherzod Shermatov DOAG (Ta’lim tizimini rivojlantirishda ko‘maklashish grant shartnomasini) doirasida yana 5,5 million dollar ajratishni nazarda tutuvchi qo‘shimcha hujjatni imzolagan. Bu mablag‘lar yoshlarning ishga kirishidan oldin ularning tadbirkorligi va ishga tayyorligini oshirish uchun ishlatiladi.
