O‘zbekistonda so‘nggi ikki oy ichida issiqlik tizimida 27 ta avariya sodir bo‘lgan. Bu haqda AOKAda o‘tkazilgan brifingda Uy-joy kommunal xizmat ko‘rsatish vazirligi vazir o‘rinbosari Qurbon Tursunov ma’lum qildi.
Tursunovning so‘zlariga ko‘ra, hozirgi kunda barcha viloyatlarda “Viloyat shtabi” tashkil etilgan bo‘lib, sohaga aloqador korxona va tashkilotlarning mas’ul xodimlari biriktirilgan. Mavsumda issiqlik ta’minoti tizimida yuzaga kelishi mumkin bo‘lgan avariya holatlarini zudlik bilan bartaraf etish maqsadida barcha hududlarda 24 soatlik dispetcherlik xizmati yo‘lga qo‘yilgan.
Shuningdek, joriy isitish mavsumi 15-oktabrdan boshlangan bo‘lib, tizimda so‘nggi 2 oy davomida jami 27 ta avariya sodir bo‘lgan. Bulardan 7 tasi ko‘p qavatli uylarning ichki tizimida, 7 tasi issiqlik tarmoqlarida, 3 ta tabiiy gaz ta’minoti bosimining pasayishi va 10 ta elektr energiyasi ta’minoti uzilishi natijasida yuzaga kelgan.
Shuningdek, Toshkent shahridagi “TS-4” qozonxonasidagi uzilishdan boshqa sezilarli darajadagi avariya holatlari sodir bo‘lmagan. Hozirda barcha qozonxonalar bir maromda ishlamoqda.
Bugungi kunda 505 ta qozonxona va 3 704 kilometr issiqlik tarmoqlari orqali, 614 577 ta xonadondan iborat 13 366 ta ko‘p qavatli uylar va 1 885 ta ijtimoiy soha obyektlari issiqlik energiyasi bilan ta’minlanmoqda.
Ta’kidlanishicha, issiqlik ta’minoti korxonalari tomonidan bir kunda 3 milliard so‘mlik issiqlik energiyasi yetkazib berilmoqda va bir kunlik tushum 1,4 milliard so‘mni (aholiga 1 metr kvadrat isitiladigan maydon uchun o‘rtacha 150 so‘m) tashkil etyapti.
Avvalroq O‘zbekistonda issiqlik tarmoqlarining 60 foizi ta’mirtalab ahvolda ekani ma’lum qilingani, Toshkentda isitish tizimiga kechikib ulangan xonadonlar qayta hisob-kitob qilingani to‘g‘risida xabar berilgandi.
Izoh (0)