АҚШ Халқаро тараққиёт агентлиги (USAID) Ўзбекистонга сил касаллигини текширувчи 30 та аппаратни совға қилди, дея хабар қилмоқда АҚШнинг Ўзбекистондаги элчихонаси.
Республика ихтисослаштирилган фтизиатрия ва пульмонология илмий-амалий тиббиёт марказида бўлиб ўтган тантанали маросимда USAID’нинг Ўзбекистондаги миссияси директори Микаела Мередит қиймати 381 минг долларлик ускуналарни соғлиқни сақлаш вазири ўринбосари Улуғбек Собировга тантанали равишда топширди.
«Бугунги тадбир USAID ва Ўзбекистон ўртасидаги минтақада соғлиқни сақлаш хизматларини яхшилаш бўйича давомий ҳамкорликнинг тимсолидир. Биз Ўзбекистон ҳукумати сил касаллигини 2050 йилгача йўқ қилиш мажбуриятини ўз зиммасига олганини олқишлаймиз, бу қадам ҳукуматнинг 2021-2026 йилларга мўлжалланган туберкулёз касаллигига қарши янги Миллий стратегиясида кўрсатилган бўлиб, 2025 йилгача туберкулёз билан касалланиш даражасини 50 фоизга ва касаллик туфайли ўлим сонини 75 фоизга камайтиришдир. Биргаликда биз Ўзбекистон фуқароларининг саломатлиги ва фаровонлигини оширишга эришамиз», – деди Микаела Мередит.
Қайд этилишича, USAID томонидан тақдим этилган GeneXpert ускунаси инновацион технологияси, молекуляр тестларни мисли кўрилмаган тезлик ва фойдаланишда енгиллиги билан ҳамма учун қулай келади.
GeneXpert диагностика усулида туберкулёзни даволашда кўп ишлатиладиган антибиотиклардан бири – рифампицинга туберкулёз микобактериясининг турғунлиги аниқланади. Бу шифокорларга маълум беморни даволаш учун ҳақиқатан ҳам самарали дори воситасини танлаш имконини беради.
Таъкидланишича, бугунги ҳадя чекка-чеккаларда жойлашган туман лабораторияларига туберкулёзга чалинган беморлар билан ишлаш бўйича хизматларини ошириш ва аҳолининг касалликка қарши замонавий, тезкор молекуляр тестлардан фойдаланиш имкониятларини сезиларли даражада кенгайтириш имконини беради. Туман лабораторияларини янги GeneXpert аппаратлари билан жиҳозлаш туберкулёзни тезроқ аниқлаш имкониятига йўл очиб беради.
Изоҳ (0)