Buxoroda bo‘lib o‘tgan Xalq deputatlari Kogon shahar Kengashining 50-sessiyasida Kogon shahri hokimi Hayot Davlatov 2020-yilda amalga oshirilgan ishlar, mavjud muammolar hamda 2021-yilda Kogon shahrini ijtimoiy-iqtisodiy rivojlantirish borasidagi ustuvor vazifalar yuzasidan hisobot berdi. Bu haqda “Daryo” muxbiri xabar qildi.
Ma’lum qilinishicha, 2021-yildan boshlab Kogon shahrida qurilish-bunyodkorlik, ichki yo‘llarni sozlash, oqova suv quvurlarini rekonstruksiya qilish, shaharning arxitektura qiyofasini yaxshilash borasida amaliy ishlar bajarilgan.
Biroq shahar qiyofasini buzib turadigan juda ko‘p eski obyektlar, e’tiborga muhtoj maskanlar, qayta qurib, foydalanishga topshirish zarur bo‘lgan aholi yashash punktlari juda ko‘p. Ayniqsa, Kogon shahrining Buxoroyi sharif, Turkiston ko‘chalaridagi xutur, ya’ni pastqam va achinarli ko‘rinishdagi hovli-joylar og‘riqli nuqtamiz bo‘lib turibdi. Ma’lumki, bunday manzillarni zamonaviy va ko‘rkam qiyofaga keltirish juda katta mablag‘ga borib taqaladi. Shu bois xaroba uylarning o‘rnida ko‘p qavatli uylar tiklash uchun prezidentimizdan pul so‘ramoqchiman, — dedi Hayot Davlatov.Hokim shaharsozlikni rivojlantirish borasida amalga oshirilishi lozim bo‘lgan ishlar xususida to‘xtalib, hududda suzish havzasi, kinozal yo‘qligi ham og‘riqli nuqta ekanini ta’kidlagan:
Shaharda 3 ta madaniyat markazi hamda 2 ta aholi dam olish istirohat bog‘i mavjud. Biroq bajarilmagan ishlarimiz hali juda ko‘p. Bitta ham kinozalimiz yo‘q. 2018-yilda bir tadbirkorga eski kinozalni qayta rekonstruksiya qilishi uchun 2,5 milliard so‘m mablag‘ ajratilgan. O‘z hisobidan esa 2 milliard sarflashi belgilangan. Lekin u faqat davlat hisobidagi ulushdan 2 milliard mablag‘ evaziga ish olib borgan va qolgan qurilish-rekonstruksiya jarayonlari to‘xtab qolgan. Bugungi kunda esa ushbu tadbirkor bilan sudlashib yurishga majbur bo‘lyapmiz.Sessiya davomida Kogon shahar hokimi “Daryo” muxbirining shahardagi “Zirobod” mahallasida joylashgan, toshdan qurilgan 16-maktabgacha ta’lim tashkilotining bugungi kundagi achinarli ahvoli xususidagi savoliga javob bergan.
Ushbu bog‘chani investitsiya dasturlari asosida rekonstruksiya qilish masalasini ko‘ryapmiz. Sababi mazkur bino uzoq yillar oldin yirik toshlardan qurilgan. Respublikadan kelgan ishchi guruh ham, viloyat rahbarimiz ham aynan shu bog‘cha bilan tanishgan. To‘g‘ri, bundan og‘ir ahvoldagi bog‘chalar ham yo‘q emas, ammo shahar uchun bu juda achinarli hol. Buni shaxsan tan olaman. Bu borada 7 marotaba xat chiqarganmiz. Xuddi shuningdek, og‘ir ahvoldagi 1 ta bog‘cha hamda 3 ta umumiy o‘rta ta’lim maktabi ham bor. To‘liq va mukammal ishlar amalga oshirilgach, 10—15 yilgacha ta’mirlash ishlariga ehtiyoj qolmaydi”, — deya qayd etgan Hayot Davlatov.
Sessiyada ta’kidlanishicha, investitsiya dasturi doirasida 2021-yilda umumiy qiymati 218,9 milliard so‘mlik jami 53 ta investitsiya loyihalari ishga tushirilish belgilangan. Bugunga qadar 44 ta loyiha ishga tushirilib, 152,5 milliard so‘mlik investitsiya o‘zlashtirilgan va 198 ta yangi ish o‘rinlari yaratilgan.
Eslatib o‘tamiz, 2021-yil 3-mart kuni o‘tkazilgan xalq deputatlari Kogon shahar kengashining navbatdan tashqari sessiyasida Hayot Davlatov shahar hokimi vazifasini bajaruvchi sifatida tayinlangandi.
Izoh (0)