Бухорода бўлиб ўтган Халқ депутатлари Когон шаҳар Кенгашининг 50-сессиясида Когон шаҳри ҳокими Ҳаёт Давлатов 2020 йилда амалга оширилган ишлар, мавжуд муаммолар ҳамда 2021 йилда Когон шаҳрини ижтимоий-иқтисодий ривожлантириш борасидаги устувор вазифалар юзасидан ҳисобот берди. Бу ҳақда «Дарё» мухбири хабар қилди.
Маълум қилинишича, 2021 йилдан бошлаб Когон шаҳрида қурилиш-бунёдкорлик, ички йўлларни созлаш, оқова сув қувурларини реконструкция қилиш, шаҳарнинг архитектура қиёфасини яхшилаш борасида амалий ишлар бажарилган.
Бироқ шаҳар қиёфасини бузиб турадиган жуда кўп эски объектлар, эътиборга муҳтож масканлар, қайта қуриб, фойдаланишга топшириш зарур бўлган аҳоли яшаш пунктлари жуда кўп. Айниқса, Когон шаҳрининг Бухоройи шариф, Туркистон кўчаларидаги хутур, яъни пастқам ва ачинарли кўринишдаги ҳовли-жойлар оғриқли нуқтамиз бўлиб турибди. Маълумки, бундай манзилларни замонавий ва кўркам қиёфага келтириш жуда катта маблағга бориб тақалади. Шу боис хароба уйларнинг ўрнида кўп қаватли уйлар тиклаш учун президентимиздан пул сўрамоқчиман, — деди Ҳаёт Давлатов.Ҳоким шаҳарсозликни ривожлантириш борасида амалга оширилиши лозим бўлган ишлар хусусида тўхталиб, ҳудудда сузиш ҳавзаси, кинозал йўқлиги ҳам оғриқли нуқта эканини таъкидлаган:
Шаҳарда 3 та маданият маркази ҳамда 2 та аҳоли дам олиш истироҳат боғи мавжуд. Бироқ бажарилмаган ишларимиз ҳали жуда кўп. Битта ҳам кинозалимиз йўқ. 2018 йилда бир тадбиркорга эски кинозални қайта реконструкция қилиши учун 2,5 миллиард сўм маблағ ажратилган. Ўз ҳисобидан эса 2 миллиард сарфлаши белгиланган. Лекин у фақат давлат ҳисобидаги улушдан 2 миллиард маблағ эвазига иш олиб борган ва қолган қурилиш-реконструкция жараёнлари тўхтаб қолган. Бугунги кунда эса ушбу тадбиркор билан судлашиб юришга мажбур бўляпмиз.Сессия давомида Когон шаҳар ҳокими «Дарё» мухбирининг шаҳардаги «Зиробод» маҳалласида жойлашган, тошдан қурилган 16-мактабгача таълим ташкилотининг бугунги кундаги ачинарли аҳволи хусусидаги саволига жавоб берган.
Ушбу боғчани инвестиция дастурлари асосида реконструкция қилиш масаласини кўряпмиз. Сабаби мазкур бино узоқ йиллар олдин йирик тошлардан қурилган. Республикадан келган ишчи гуруҳ ҳам, вилоят раҳбаримиз ҳам айнан шу боғча билан танишган. Тўғри, бундан оғир аҳволдаги боғчалар ҳам йўқ эмас, аммо шаҳар учун бу жуда ачинарли ҳол. Буни шахсан тан оламан. Бу борада 7 маротаба хат чиқарганмиз. Худди шунингдек, оғир аҳволдаги 1 та боғча ҳамда 3 та умумий ўрта таълим мактаби ҳам бор. Тўлиқ ва мукаммал ишлар амалга оширилгач, 10—15 йилгача таъмирлаш ишларига эҳтиёж қолмайди», — дея қайд этган Ҳаёт Давлатов.
Сессияда таъкидланишича, инвестиция дастури доирасида 2021 йилда умумий қиймати 218,9 миллиард сўмлик жами 53 та инвестиция лойиҳалари ишга туширилиш белгиланган. Бугунга қадар 44 та лойиҳа ишга туширилиб, 152,5 миллиард сўмлик инвестиция ўзлаштирилган ва 198 та янги иш ўринлари яратилган.
Эслатиб ўтамиз, 2021 йил 3 март куни ўтказилган халқ депутатлари Когон шаҳар кенгашининг навбатдан ташқари сессиясида Ҳаёт Давлатов шаҳар ҳокими вазифасини бажарувчи сифатида тайинланганди.
Изоҳ (0)