Samarqand viloyatining Ishtixon tumani Qulchora qishlog‘ida yashovchi Jamshed O‘sarov oilasida uch egizak o‘g‘il dunyoga keldi. Bu haqda oilaning yaqin qarindoshlaridan biri “Daryo”ga ma’lum qildi.
O‘g‘illar Samarqand viloyati perinatal markazida 7-dekabr kuni dunyoga kelgan. Egizaklardan avval Jamshed O‘sarov va onasi Mahliyo Abdeyevaning 2013-yilda tug‘ilgan o‘g‘li va 2017-yilda tug‘ilgan qiz farzandi bo‘lgan.
Samarqand viloyat perinatal markazi shifokorining “Daryo”ga ma’lum qilishicha, bolalarning hozirgi ahvoli yaxshi. 16-dekabr kuni ularga uyga ketishga ruxsat beriladi.
“36 haftalik bo‘lgan egizaklar 7-dekabr kuni operatsiya (kesarcha kesish) yo‘li bilan dunyoga keldi. Egizaklarning har birining vazni 2 kilogrammdan ortiq (birinchi egizak 2,1 kilogramm, ikkinchi va uchinchisi 2,3 kilogramm). Hozirda chaqaloqlarning ham, onasining ham ahvoli yaxshi”, — deydi egizaklar salomatligini nazoratga olgan shifokor Habiba Bozorova.
DXA Samarqand viloyat boshqarmasi axborot xizmatining ma’lum qilishicha, 13-dekabr kuni Ishtixon tuman FHDYo bo‘limi tomonidan egizaklarga tug‘ilganlik guvohnomalari rasmiylashtirilib, ularga Shavkat, Mirziyo, Miromon deb ism qo‘yilgan.
Davlat statistika qo‘mitasi ma’lumotlariga ko‘ra, O‘zbekistonda 10 yil davomida uch nafar egizaklar tug‘ilishi 4 baravarga ko‘paydi. 2021-yilning birinchi yarmida egizaklar soni bo‘yicha Samarqand viloyati yetakchi bo‘lgan.
Mavzuga doir:
- Qarshida uch egizak dunyoga keldi. Ularga Shavkat, Miromon, Mirziyo deb ism qo‘yildi
- Qashqadaryoda tug‘ilgan 3 egizakka Ziroat, Saida va Shahnoza ismlari qo‘yildi. Buning uchun Prezidentdan ruxsat olingan
- Navoiyda uch egizak tug‘ildi. Ularga Shukrona, Shodiyona, Imona ismlari qo‘yildi
- Buxoroda 3 egizak tug‘ildi. Ularga Mirziyo, Miromon va Saida ismlari qo‘yildi (foto)
Izoh (0)