Ichki ishlar vazirligi huzuridagi Tergov departamenti joylarda transport vositalari o‘g‘irlanishi bilan bog‘liq bir qator holatlarni aniqladi.
Jumladan, Toshkent shahri Bektemir tumani Somonbozor ko‘chasida 10-dekabr kuni soat 13:00 atrofida T.T.(2002-yilda tug‘ilgan), K.X.ga (1983-yilda tug‘ilgan) tegishli kalitlari bilan qarovsiz qolib ketgan Damas avtomashinasini noma’lum tomonga olib qochib ketgan.
Ma’lum qilinishicha, olib borilgan tezkor-qidiruv ishlari natijasida transport vositasi va qonunbuzar ichki ishlar organlari xodimlari tomonidan ushbu ko‘chaning o‘zida ushlangan.
Jinoyat ishi bo‘yicha olib borilgan dastlabki tergov davomida T.S. ruhiy asab kasalliklari dispanseri hisobida turishi aniqlangan.
Mazkur holat yuzasidan S.T.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Bundan tashqari, Namangan viloyati Davlatobod tumanida 13-dekabr kuni “To‘quvchi” mahallasida yashovchi 46 yoshli S.V. tuman IIB boshlig‘i nomiga ariza bilan murojaat qilib, unda shu kuni soat 12:30 atrofida Tico avtomashinasini yashash xonadoni oldidagi maydonda qoldirib, soat 16:30 atrofida yashash xonadonidan qaytib chiqqanda mashina qoldirilgan joyida yo‘qligini ma’lum qilgan.
Qayd etilishicha, tergovga qadar tekshiruvda jinoyatni Namangan shahrida yashovchi Q.A. (2002-yilda tug‘ilgan) sodir etgani aniqlangan. U mashina yo‘lda buzilib qolgani uchun uni tuzatish uchun texnik xizmat ko‘rsatish shoxobchasiga tashlab, ustalarga telefon raqamini berganini ma’lum qilgan.
Mashina “Navbahor” mahallasida joylashgan ustaxonadan xolislar ishtirokida ashyoviy dalil sifatida olingan.
Mazkur holat yuzasidan Q.A.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Ma’lumot uchun, ushbu turdagi jinoyatni sodir etgan shaxs besh yildan o‘n yilgacha ozodlikdan mahrum qilish bilan jazolanadi.
Izoh (0)