O‘zbekiston yo‘llarida so‘nggi kunlarda yuz bergan YTH tafsilotlarini taqdim etamiz.
Shayxontohurda Nexia-3 ikki avtomobil va bir piyodani urib ketdi.
Toshkent shahar Shayxontohur tumani THAY ko‘chasida o‘z yo‘nalishida harakatlanib kelayotgan Nexia-3 yo‘lidan Spark chiqib qolishi sabab rulni keskin chapga burgan. Shundan so‘ng mazkur yo‘nalishning chap tarafida kelayotgan yana bir Nexia-3 bilan to‘qnashgan.
Avtomobil rul boshqaruvini yo‘qotib, yo‘lni ikkiga ajratib turuvchi yashil maydonda turgan piyodani urgan va qarama–qarshi yo‘nalishda kelayotgan “VAZ” avtomashinasi bilan to‘qnashgan.
Oqibatda piyoda voqea joyida vafot etgan.
“VAZ” haydovchisi va uning ikki yo‘lovchisi ham tan jarohati olib shifoxonaga yotqizilgan.
Holat yuzasidan Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.
Sergelida “VAZ” boshqaruvni yo‘qotib temir ustunga urildi.
Sergeli tumani Yangi Sergeli ko‘chasida harakatlanib kelayotgan “VAZ-2106” boshqaruvni yo‘qotib yo‘l chetidagi temir ustunga borib urilgan.
Oqibatda haydovchi voqea joyida vafot etgan, yo‘lovchi tan jarohati olib shifoxonaga yotqizilgan.
Yo‘lovchining ma’lum qilishicha, haydovchi sog‘lig‘i yomonlashgani sabab boshqaruvni yo‘qotgan. Hozirda tergovga qadar tekshiruv harakatlari olib borilmoqda.
Parkentda yuk mashinasi Lacetti va Spark ustiga ag‘darildi.
Dastlabki ma’lumotlarga ko‘ra, 2021-yil 15-dekabr kuni soat 16:00 larda, Toshkent viloyati, Parkent tumani hududidan o‘tgan 4R-15 Qiziltog‘–Parkent–Yangibozor avtomobil yo‘lining 56-kilometrida haydovchi J.N. (1998-yilda tug‘ilgan) Howo yuk mashinasida harakatlanayotib burilishda boshqaruvni yo‘qotgan va transport vositasi ustiga ag‘darilgan.
Ag‘darilish jarayonida yo‘l chetida to‘xtab turgan Lacetti va Spark avtomobillariga texnik shikast yetgan (avtomobil salonida fuqarolar bo‘lmagan).
YTH natijasida haydovchiga birinchi tez tibbiy yordam ko‘rsatilgan.
Mazkur YTH yuzasidan Parkent tumani IIB YHXB xodimlari tomonidan surishtiruv olib borilmoqda.
Mavzuga doir:
Izoh (0)