Тошкент ва Наманганда 19 ёшли йигитлар Damas ва Tico автомобилларини олиб қочди

Ички ишлар вазирлиги ҳузуридаги Тергов департаменти жойларда транспорт воситалари ўғирланиши билан боғлиқ бир қатор ҳолатларни аниқлади.

Жумладан, Тошкент шаҳри Бектемир тумани Сомонбозор кўчасида 10 декабрь куни соат 13:00 атрофида Т.Т.(2002 йилда туғилган), К.Х.га (1983 йилда туғилган) тегишли калитлари билан қаровсиз қолиб кетган Damas автомашинасини номаълум томонга олиб қочиб кетган.

Маълум қилинишича, олиб борилган тезкор-қидирув ишлари натижасида транспорт воситаси ва қонунбузар ички ишлар органлари ходимлари томонидан ушбу кўчанинг ўзида ушланган.

Жиноят иши бўйича олиб борилган дастлабки тергов давомида Т.С. руҳий асаб касалликлари диспансери ҳисобида туриши аниқланган.

Мазкур ҳолат юзасидан С.Т.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган. Ҳозирда тергов ҳаракатлари олиб борилмоқда.

Бундан ташқари, Наманган вилояти Давлатобод туманида 13 декабрь куни «Тўқувчи» маҳалласида яшовчи 46 ёшли С.В. туман ИИБ бошлиғи номига ариза билан мурожаат қилиб, унда шу куни соат 12:30 атрофида Tico автомашинасини яшаш хонадони олдидаги майдонда қолдириб, соат 16:30 атрофида яшаш хонадонидан қайтиб чиққанда машина қолдирилган жойида йўқлигини маълум қилган.

Қайд этилишича, терговга қадар текширувда жиноятни Наманган шаҳрида яшовчи Қ.А. (2002 йилда туғилган) содир этгани аниқланган. У машина йўлда бузилиб қолгани учун уни тузатиш учун техник хизмат кўрсатиш шохобчасига ташлаб, усталарга телефон рақамини берганини маълум қилган.

Машина «Навбаҳор» маҳалласида жойлашган устахонадан холислар иштирокида ашёвий далил сифатида олинган.

Мазкур ҳолат юзасидан Қ.А.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган. Ҳозирда тергов ҳаракатлари олиб борилмоқда.