Malta Yevropa Ittifoqida birinchi bo‘lib kannabisdan shaxsiy maqsadlarda foydalanishga ruxsat berdi

Yevropa Ittifoqidagi eng kichik davlat hisoblanuvchi Malta parlamenti kannabisni shaxsiy rekreatsion maqsadlarda cheklangan miqdorda yetishtirish, sotib olish va saqlashga ruxsat beruvchi qonunni ma’qulladi. Bu haqda Reuters agentligiga tayanib, Meduza xabar berdi.

Qonunga 14-dekabr kuni Malta Vakillar palatasining 36 deputati yoqlab ovoz bergan bo‘lsa, 27 nafari bunga qarshi chiqqan. Hujjatni bir necha kun ichida mamlakat prezidenti Jorj Vella tasdiqlashi kerak. Maltaning muxolif siyosatchilari prezidentni qonunni imzolamaslikka chaqirgan.

Sunday Times of Malta’ning yozishicha, qonun katta yoshdagi insonlarga kannabis yetishtirish uchun uning urug‘ini xarid qilish imkonini beradi. Ular maxsus assotsiatsiyalar orqali tarqatiladi, bitta inson faqat bitta assotsiatsiya a’zosi bo‘la olishi mumkin.

Iste’molchilar erkin holda yetti grammgacha kannabisga ega bo‘lishi va to‘rt tupgacha o‘simlikni yetishtirishi mumkin. Kannabis saqlagani uchun sudlangan istalgan kishi o‘zidan sudlanganlikni olib tashlanishi uchun ariza bera oladi.

Agarda fuqaro yonida yetti grammdan ko‘proq, biroq 28 grammdan kam bo‘lgan miqdorda kannabis saqlagani aniqlansa, 100 yevrogacha jarimaga tortilishi mumkin. Jamoat joylarida kannabis chekish oldingidek qonun bilan taqiqlanadi: buning uchun 235 yevro jarima qo‘llanadi. 18 yoshgacha bo‘lgan fuqaro oldida chekish uchun esa 300 yevrodan 500 yevrogacha jarima belgilanishi mumkin.

Ta’kidlanishicha, Malta kannabisdan shaxsiy maqsadlarda foydalanish uchun ruxsat bergan Yevropadagi birinchi mamlakatga aylangan. Bundan oldin Lyuksemburg, Germaniya va Shveysariya hukumatlari boshqariluvchi marixuana bozorlarini yaratish rejalari haqida ma’lum qilgan, biroq hech qanday qonun qabul qilinmagan edi. Niderlandiyadagi “kofeshop”larda oz miqdorda kannabis sotishga ruxsat berilgan bo‘lsa-da, mamlakatda u hamon taqiqda.

Avvalroq AQShda marixuanaga ruxsat berilishi yo‘llarda avariyalar sonining ortishiga olib kelayotgani, BMT marixuanani xavfli giyohvandlik moddalari ro‘yxatidan chiqarib tashlagani to‘g‘risida xabar berilgandi.