Belarusdagi prezidentlik saylovlarida ishtirok etgan va Belarus muxolifati yetakchisiga aylangan Svetlana Tixanovskayaning turmush o‘rtog‘i, bloger Sergey Tixanovskiyni sud 18 yillik kuchaytirilgan rejimdagi koloniyaga hukm qildi. Bu haqda “Belta” agentligiga taynib, Meduza xabar berdi.
Tixanovskiy ustidan sud jarayoni Gomeldagi tergov izolyatorida yopiq eshiklar ortida bo‘lib o‘tdi. U bilan birga yana besh kishi sudlandi — Tixanovskiyning “Strana dlya jizni” (“Mamlakat hayot uchun”) YouTube kanali operatori Artyom Sakov, loyihaning ijtimoiy tarmoqlardagi moderatori Dmitriy Popov (har biri 16 yillik kuchaytirilgan rejimdagi koloniyaga hukm qilindi), MozgON YouTube kanali muallifi Vladimir Siganovich va “Belarus golovnogo mozga” telegram kanali muallifi Igor Losik (har biri 15 yillik kuchaytirilgan rejimdagi koloniyaga), shuningdek, belaruslik muxolifatchi siyosatchi Nikolay Statkevich (14 yillik kuchaytirilgan rejimdagi koloniyaga hukm qilindi).
Bundan tashqari, sudlanuvchilardan 2,5 million Belarus rubli (994,8 ming dollar)dan ortiq moddiy zarar undirilgan.
“Strana dlya jizni’ yozuvi ostida belaruslarga darg‘azab olomonning hokimiyatni qay tarzda egallashi haqida spektakl ko‘rsatishga urinilgan. Tergovda aniqlanganidek, buning uchun psixologik ta’sir o‘tkazish usullari, soxtalashtirish va faollarni pora bilan sotib olishga urinishlar bo‘lgan, ko‘cha urushiga tayyorgarlik ko‘rilgan” — deya ma’lum qildi Belarus Tergov qo‘mitasi sud hukmi o‘qilganidan keyin.
Sergey Tixanovskiy 2019-yilda YouTube’da “Strana dlya jizni” blogini ochgan. Unda u Belarus hukumatini tanqid qilar, kichik shaharlar aholisi va muxolifat faollari bilan intervyularni joylashtirar edi. Blog ommalashib ketdi, 2020-yilda esa Tixanovskiy Belarusdagi prezidentlik saylovlarida ishtirok etmoqchiligini e’lon qildi. Ammo uning nomzod sifatida ro‘yxatdan o‘tishiga ruxsat berilmadi. Blogerning o‘rniga rafiqasi Svetlana Tixanovskaya prezidentlikka nomzodini qo‘ydi. Sergey uning tashabbus guruhini boshqargan. 2020-yil may oyining oxirida imzo yig‘ish piketi chog‘ida Sergey Tixanovskiy hibsga olingan.
2020-yil avgust oyida Tixanovskaya prezidentlik saylovlarida muxolifatdan yagona nomzod sifatida qatnashdi. Belarus Markaziy saylov komissiyasi ma’lumotlariga ko‘ra, Tixanovskaya 80 foiz ovoz olgan Aleksandr Lukashenkodan keyin 10 foiz ovoz bilan ikkinchi o‘rinni egalladi. Tixanovskaya ushbu natijani tan olmadi. Saylovdan bir necha kun o‘tgach, u Belarus hukumati bosimi ostida Litvaga jo‘nab ketdi. Belarusda esa Lukashenkoga qarshi norozilik namoyishlari boshlandi va bir necha oy davom etdi.
Sergey Tixanovskiy ommaviy tartibsizliklar va jamoat tartibini qo‘pol rabovishda buzuvchi guruh harakatlarini tashkillashtirishda, “hokimiyat va huquqni muhofaza qilish organlari vakillariga qarshi” ijtimoiy nafrat uyg‘otishda, shuningdek, o‘sha paytda MSK raisi bo‘lgan Lidiya Yermoshinaga tahdid qilishda ayblangan. Tergov ma’lumotlariga ko‘ra, saylovdan keyingi noroziliklarni qo‘zg‘atganlar — aynan Tixanovskiy hamda uning sheriklari deb ataluvchi shaxslar bo‘lgan.
Ushbu norozilik namoyishlari davomida, 2020-yilning kuzida Lukashenko Tixanovskiy va boshqa siyosiy mahbuslar bilan uchrashib, ular bilan avval va’da qilingan Konstitutsiyaga o‘zgartirishlar kiritish masalasini muhokama qilish uchun tergov izolyatoriga borgan. Ertasi kuni yig‘ilish ishtirokchilaridan ikki nafari tergov izolyatoridan ozod etildi. Ular orasida Tixanovskiy yo‘q edi — unga to‘rt oy ichida birinchi marta xotini bilan telefonda gaplashishga ruxsat berildi. Tixanovskayaning telegram-kanalida suhbatdan parchalar e’lon qilingan, Sergey suhbatlarda Svetlanani “og‘irroq bo‘lishga” chaqirgan.
Turmush o‘rtog‘iga hukm chiqarilishidan avval Tixanovskaya Sergeyga 15 yildan ortiq qamoq jazosi berilishi mumkinligini taxmin qilgandi.
“Ammo masala raqamlarda emas. Bir, besh, o‘n bir, yigirma — bu raqamlar belaruslarning haqiqatda ozodlikdan mahrum yillari bo‘lmasligi zarur”, — deya qo‘shimcha qilgan u.
“Uning (Lukashenko) ushbu ‘jazo hukmi’ haqida shunday fikr bildirishim mumkin. O‘zimga birgina savol beraman: bu yangilikdan so‘ng nima qilaman? Men o‘zim sevgan va millionlab belaruslarning yetakchisiga aylangan odamni himoya qilishda davom etaman. U bilan yangi Belarusdagi uchrashuvimiz damlarini yaqinlashtirish uchun o‘ta mashaqqatli, ehtimol, imkonsiz ishni bajarishga harakat qilaman. Men unga tabriknomalar va bolalar chizgan rasmlarni yuborishda davom etaman, vaqt o‘tib uchrashganimizda ulardan esdalik albom yaratamiz”, — dedi Tixanovskaya.
Izoh (0)