Европа Иттифоқидаги энг кичик давлат ҳисобланувчи Мальта парламенти каннабисни шахсий рекреацион мақсадларда чекланган миқдорда етиштириш, сотиб олиш ва сақлашга рухсат берувчи қонунни маъқуллади. Бу ҳақда Reuters агентлигига таяниб, Meduza хабар берди.
Қонунга 14 декабрь куни Мальта Вакиллар палатасининг 36 депутати ёқлаб овоз берган бўлса, 27 нафари бунга қарши чиққан. Ҳужжатни бир неча кун ичида мамлакат президенти Жорж Велла тасдиқлаши керак. Мальтанинг мухолиф сиёсатчилари президентни қонунни имзоламасликка чақирган.
Sunday Times оф Мальта’нинг ёзишича, қонун катта ёшдаги инсонларга каннабис етиштириш учун унинг уруғини харид қилиш имконини беради. Улар махсус ассоциациялар орқали тарқатилади, битта инсон фақат битта ассоциация аъзоси бўла олиши мумкин.
Истеъмолчилар эркин ҳолда етти граммгача каннабисга эга бўлиши ва тўрт тупгача ўсимликни етиштириши мумкин. Каннабис сақлагани учун судланган исталган киши ўзидан судланганликни олиб ташланиши учун ариза бера олади.
Агарда фуқаро ёнида етти граммдан кўпроқ, бироқ 28 граммдан кам бўлган миқдорда каннабис сақлагани аниқланса, 100 еврогача жаримага тортилиши мумкин. Жамоат жойларида каннабис чекиш олдингидек қонун билан тақиқланади: бунинг учун 235 евро жарима қўлланади. 18 ёшгача бўлган фуқаро олдида чекиш учун эса 300 евродан 500 еврогача жарима белгиланиши мумкин.
Таъкидланишича, Мальта каннабисдан шахсий мақсадларда фойдаланиш учун рухсат берган Европадаги биринчи мамлакатга айланган. Бундан олдин Люксембург, Германия ва Швейцария ҳукуматлари бошқарилувчи марихуана бозорларини яратиш режалари ҳақида маълум қилган, бироқ ҳеч қандай қонун қабул қилинмаган эди. Нидерландиядаги «кофешоп»ларда оз миқдорда каннабис сотишга рухсат берилган бўлса-да, мамлакатда у ҳамон тақиқда.
Аввалроқ АҚШда марихуанага рухсат берилиши йўлларда авариялар сонининг ортишига олиб келаётгани, БМТ марихуанани хавфли гиёҳвандлик моддалари рўйхатидан чиқариб ташлагани тўғрисида хабар берилганди.
Мавзуга доир:
Изоҳ (0)