Aleksandr Lukashenko Belarus, uning fuqarolari va tashkilotlariga qarshi sanksiyalar qo‘llashga chaqirganlarni jinoiy javobgarlikka tortuvchi qonunni imzoladi. Bu haqda Meduza xabar berdi.
Agar bu chaqiriqlar oddiy odamlarga qaratilgan bo‘lsa, olti yilgacha, xorijiy davlatlarga qaratilgan bo‘lsa, o‘n yilgacha ozodlikdan mahrum qilish jazosi belgilanadi. Agar chaqiriqlar korxonalarning sanksiyalar ro‘yxatiga tushishiga olib kelsa yoki ushbu murojaatlar mansabdor shaxs tomonidan yo‘llangan bo‘lsa, bunga jazo 12 yilgacha ozodlikdan mahrum etish bo‘lishi mumkin.
Lukashenkoning matbuot xizmati yangi qonunni “buzg‘unchi kuchlarning milliy xavfsizlikka zarar yetkazishga bo‘lgan urinishlariga adekvat javob” deb atadi.
G‘arb davlatlari bir necha yillardan beri Belarusga qarshi sanksiyalar oqimini joriy etmoqda. Xususan, Yevropa Ittifoqi va AQSh 2020-yilning kuzida prezidentlik saylovlaridan keyin bo‘lib o‘tgan ommaviy noroziliklar tufayli Belarusga qarshi cheklovlar joriy qila boshladi. Markaziy saylov komissiyasi ma’lumotlariga ko‘ra, saylovda Lukashenko g‘alaba qozongan edi.
Sanksiyalarning navbatdagi raundiga muxolifatchi Nexta Telegram-kanalining sobiq bosh muharriri Roman Protasevich bilan bog‘liq vaziyat sabab bo‘ldi: u o‘tirgan Afina—Vilnyus yo‘nalishidagi samolyot favqulodda Minskka qo‘ndirilgan edi. Shundan so‘ng Protasevich ommaviy tartibsizliklarni uyushtirganlikda ayblanib, hibsga olindi.
Belarusga qarshi sanksiyalarning so‘nggi raundiga Polsha bilan chegaradagi migratsiya inqirozi sabab bo‘ldi, Bryussel bu provokatsiyada Minskni aybladi. Yevropa Ittifoqining o‘zi allaqachon beshta sanksiyalar paketini joriy qilgan, oxirgisi 2-dekabr kuni e’lon qilingan. AQSh ham 2- dekabr kuni Belarusga qarshi yangi sanksiyalar kiritdi.
Izoh (0)