Александр Лукашенко Беларусь, унинг фуқаролари ва ташкилотларига қарши санкциялар қўллашга чақирганларни жиноий жавобгарликка тортувчи қонунни имзолади. Бу ҳақда Meduza хабар берди.
Агар бу чақириқлар оддий одамларга қаратилган бўлса, олти йилгача, хорижий давлатларга қаратилган бўлса, ўн йилгача озодликдан маҳрум қилиш жазоси белгиланади. Агар чақириқлар корхоналарнинг санкциялар рўйхатига тушишига олиб келса ёки ушбу мурожаатлар мансабдор шахс томонидан йўлланган бўлса, бунга жазо 12 йилгача озодликдан маҳрум этиш бўлиши мумкин.
Лукашенконинг матбуот хизмати янги қонунни «бузғунчи кучларнинг миллий хавфсизликка зарар етказишга бўлган уринишларига адекват жавоб» деб атади.
Ғарб давлатлари бир неча йиллардан бери Беларусга қарши санкциялар оқимини жорий этмоқда. Хусусан, Европа Иттифоқи ва АҚШ 2020 йилнинг кузида президентлик сайловларидан кейин бўлиб ўтган оммавий норозиликлар туфайли Беларусга қарши чекловлар жорий қила бошлади. Марказий сайлов комиссияси маълумотларига кўра, сайловда Лукашенко ғалаба қозонган эди.
Санкцияларнинг навбатдаги раундига мухолифатчи Nexta Telegram-каналининг собиқ бош муҳаррири Роман Протасевич билан боғлиқ вазият сабаб бўлди: у ўтирган Афина—Вильнюс йўналишидаги самолёт фавқулодда Минскка қўндирилган эди. Шундан сўнг Протасевич оммавий тартибсизликларни уюштирганликда айбланиб, ҳибсга олинди.
Беларусга қарши санкцияларнинг сўнгги раундига Польша билан чегарадаги миграция инқирози сабаб бўлди, Брюссель бу провокацияда Минскни айблади. Европа Иттифоқининг ўзи аллақачон бешта санкциялар пакетини жорий қилган, охиргиси 2 декабрь куни эълон қилинган. АҚШ ҳам 2- декабрь куни Беларусга қарши янги санкциялар киритди.
Изоҳ (0)