“Turistik salohiyati yuqori tumanlarni rivojlantirish uchun dastlabki bosqichda 200 milliard so‘m ajratiladi” – Shavkat Mirziyoyev

Prezident Shavkat Mirziyoyev boshchiligida o‘tkazilayotgan videoselektor yig‘ilishida endilikda turistik salohiyati yuqori bo‘lgan tumanlarning “master plani” ishlab chiqilib, zarur infratuzilma bilan ta’minlanishi, yerlar tadbirkorlarga tayyor loyiha bilan auksionga chiqarilishi ma’lum qilindi. Bu ishlarni dastlabki bosqichda boshlash uchun 200 milliard so‘m ajratiladi, deya xabar qilmoqda “Daryo” muxbiri.

Ayni yangilik xizmatlar sohasini rivojlantirish uchun har bir hududga alohida yondashuv asosida ishlab chiqiladigan dastur doirasida tashkil qilinadi. Dasturga ko‘ra aholi soni, geografik joylashuvi, iqtisodiy salohiyatidan kelib chiqib, hududlarda xizmatlar 3 ta yo‘nalishda rivojlantiriladi. 158 ta qishloq tumanlar ixtisoslashuvidan kelib chiqib rivojlantirilishi, yirik turistik obyektlari mavjud 45 ta hamda 40 ta tog‘li va tog‘oldi tumanda “tayyor loyiha” (podklyuch) asosida turizm xizmatlari yo‘lga qo‘yiladi.

Prezident tomonidan mas’ul tashkilotlarga ikki oy muddatda xalqaro moliya tashkilotlari bilan muzokaralar o‘tkazib, kelgusi yilda turistik hududlarda infratuzilmani yaxshilashga 100 million dollar jalb qilish bo‘yicha topshiriq berildi.

Endilikda:

• yangi mehmonxona, dam olish maskanlari uch yil davomida mol-mulk va yer solig‘ini 2 barobar past stavkada to‘laydi;
• turizm sohasi uchun maxsus soliq rejimi joriy etilib, uch yil davomida aylanmadan olinadigan soliq va ijtimoiy soliq 1 foiz stavkada, mol-mulk va yer soliqlari esa hisoblangan summadan 1 foizi miqdorida belgilanadi;
• oilaviy tadbirkorlik dasturlari doirasida, mehmon uylarini tashkil etish va ta’mirlash uchun ham imtiyozli kredit ajratiladi. Bu ishlarga 2022-yilda 500 milliard so‘m yo‘naltirilishi ma’lum qilindi.

Mas’ul tashkilotlarga bir oy muddatda maxsus soliq rejimi joriy qilinadigan tuman va shaharlar ro‘yxatini shakllantirib, qaror loyihasiga ilova qilish topshiriq sifatida berildi.

Davlat rahbari Shahrisabz tumanining Navro‘z, Miraki, Oqdaryo va Hisor hududlariga yiliga 500 mingga yaqin sayyohlar kelishi, biroq yo‘l, mobil aloqa va internet, mehmonxona, umumiy ovqatlanish infratuzilmasi rivojlanmagani bois sayyohlar bir kunga kelib, ularga o‘rtacha 150 ming so‘mlik xizmat ko‘rsatilayotganini tanqid qildi. Agar 60 milliard so‘m evaziga ushbu hududdagi 65 kilometr yo‘lni ta’mirlab, internet va mobil aloqa hal qilib berilsa, xizmatlar 3–4 barobarga oshishi qayd etildi.

Xuddi shunday, Qamashida jahonda sanoqli va noyob bo‘lgan “Maydanak” observatoriyasi hamda 14-asr yodgorligi hisoblangan “Langar ota” masjidi butun dunyodan turistlarni jalb qilishi, ammo ushbu obyektlarga olib boruvchi 38 kilometr yo‘l ta’mirtalab bo‘lgani uchun (40 milliard so‘m zarur) Maydanakning salohiyatini to‘liq ishga solib bo‘lmayotgani tanqid qilindi.