O‘zbekiston SSV markaziy apparati xodimlarining 40 foizi vazifasidan ozod etildi

Sog‘liqni saqlash vazirligida 14-dekabr kuni navbatdan tashqari Hay’at yig‘ilishi bo‘lib o‘tdi. U o‘ta keskin ruhda kechib, tizimda har bir yo‘nalish bo‘yicha yo‘l qo‘yilgan xato va kamchiliklar tanqidiy tahlil etildi, deb xabar berdi SSV matbuot xizmati.

Ma’lum qilinishicha, keyingi paytlarda fuqarolarning tibbiyot sohasidan norozi ekani to‘g‘risida vazirlikka juda ko‘p murojaatlar kelgan. Masalan, 2021-yilning o‘tgan 11 oyida kelib tushgan jami murojaatlar soni o‘tgan yilning shu davriga nisbatan qariyb 12 mingtaga ko‘payib, 57 600 tani tashkil etgan. Ularning eng katta qismini sifatsiz tibbiy xizmat ko‘rsatish bilan bog‘liq masalalar tashkil etadi.

Qayd etilishicha, fuqarolar o‘rtasida ayrim kasalliklar ko‘rsatkichlari yil sayin oshib bormoqda. Xususan, so‘nggi besh yilda yurak-qon tomir xastaliklariga chalinish holatlari 20 foizga ko‘paygan.

Qolaversa, bitta tumanda kamida 10—15 ta laboratoriya bo‘lishiga qaramay, qonni tahlil qilishga sharoit va mutaxassislar malakasi yetishmasligi oqibatida diabetning og‘ir asoratlari — ko‘z, buyrak va to‘piq kasalliklari bo‘yicha respublika muassasalariga murojaatlar 10 foizga oshgan.

“Bularning barchasi sog‘liqni saqlash sohasi boshqaruv tizimida bugungi zamon talablariga mos, yangicha fikrlovchi, tashabbuskor, muammoli masalalar yechimiga professional va kreativ yondashadigan kadrlar yetishmasligi bilan bog‘liq”, — deyiladi xabarda.

Shundan kelib chiqib, Sog‘liqni saqlash vazirligi markaziy apparatining o‘z faoliyatida natija bermagan 40 foiz xodimlari vazifasidan ozod etilgan va ularga quyi bo‘g‘in tibbiyot muassasalarida ishlash taklif qilingan.

Ta’kidlanishicha, vazirlik doirasida boshlangan kadrlar yangilash islohoti respublikadagi barcha davolash-profilaktika muassasalarini qamrab oladi. Mazkur jarayonda aholidan kelib tushayotgan e’tiroz va shikoyatlar asosiy mezon bo‘ladi.

Eslatib o‘tamiz, 10-dekabr kuni Shavkat Mirziyoyev videoselektor yig‘ilishida endokrin kasalliklarini birlamchi bo‘g‘inda erta aniqlash muammolariga to‘xtalib o‘tgandi. “Tumanlarda sharoit va mutaxassislar malakasi yetishmasligi oqibatida, diabetning og‘ir asoratlari bo‘yicha murojaatlar oshgan”, — degan Shavkat Mirziyoyev.

Avvalroq sog‘liqni saqlash vaziri Abduhakim Hojiboyev lavozimidan ozod etilgani va u O‘zbekiston kasaba uyushmalari federatsiyasiga o‘tishi kutilayotgani to‘g‘risida xabar berilgandi. Shu kunning o‘zida O‘zbekiston prezidentining tegishli farmoni bilan bosh vazir o‘rinbosari lavozimida ishlab kelgan Behzod Musayev sog‘liqni saqlash vaziri etib tayinlangan. Keyinchalik u sobiq sog‘liqni saqlash vaziri tomonidan qo‘llangan barcha intizomiy jazo choralarini olib tashlagan.