O‘zbekistonda vaksina olishi ko‘zda tutilgan aholining 55 foizi to‘liq emlandi

11-dekabr holatiga ko‘ra, O‘zbekistonda emlanishi ko‘zda tutilgan aholining 55 foizi koronavirusga qarshi to‘liq emlandi, deb xabar beradi SSV matbuot xizmati.

Ta’kidlanishicha, umumiy hisobda to‘liq emlash kurslarini olgan fuqarolar soni 11 797 635 nafarni tashkil qilmoqda.

Shundan:

• 793 431 nafari 65 yoshdan oshganlar,
• 421 017 nafari tibbiyot xodimlari,
• 420 552 nafari maktab o‘qituvchilari,
• 164 466 nafari maktabgacha ta’lim tashkilotlari xodimlari,
• 782 182 nafari surunkali kasalligi bor fuqarolardir. Qolgan vaksinalar aholining boshqa qatlamlarini emlash uchun qo‘llanilgan.

Bundan avval O‘zbekistonga Pfizer vaksinasining 301 860 dozalik partiyasi olib kelingani, O‘zbekistonda foydalanilgan vaksinalar soni 35 mln dozadan oshgani hamda O‘zbekistonda koronavirusga qarshi buster doza bilan emlash boshlangani haqida xabar berilgandi.

Ma’lumot uchun, mamlakatda aholini koronavirusga qarshi emlash tadbirlari 1-apreldan boshlandi. Emlash ixtiyoriy va bepul, fevral oyida vaksina olishdan bosh tortganlarga hech qanday chora ko‘rilmasligi aytilgandi. Iyun oxiridan boshlab esa Toshkentda 18 yoshdan oshganlar koronavirusga qarshi ommaviy emlash boshlangan. 28-sentabrdan 12 yoshdan katta bolalarni ham koronavirusga qarshi Pfizer vaksinasi bilan ixtiyoriy ravishda emlashga ruxsat berilgandi.

Eslatib o‘tamiz, iyul o‘rtalarida O‘zbekistonda 18 yoshdan oshgan 14 ta toifadagi fuqarolar koronavirusga qarshi emlanishi shart etib belgilandi. Ular orasida aholi bilan muloqotga kiruvchi barcha turdagi xizmat ko‘rsatish obyektlarining (davlat xizmatlari markazlari, pochta bo‘linmalari, banklar, lizing tashkilotlari, notariuslar, sug‘urta kompaniyalari, go‘zallik salonlari, sartaroshxonalar va boshqalarning) xodimlari ham bor.