Qoraqalpog‘istonda aliment muammosi sabab sobiq turmush o‘rtog‘ini o‘ldirgan erkakka sud hukmi o‘qildi. Bu haqda Zo‘r TV telekanalining “Bu kun” informatsion dasturida ma’lum qilindi.
Ma’lum qilinishicha, farzandlarini ko‘rgani kelgan fuqaro E.O‘. aliment to‘lamay kelgani sabab sobiq turmush o‘rtog‘i bilan janjallashib qolgan. Ayol erkakning yuziga tarsaki tushirganidan so‘ng, erkak unga yetti marta pichoq urgan.
Jinoyat ishlari bo‘yicha Qonliko‘l tumanining 2021-yil 23-avgust kungi E.O‘.ga nisbatan Jinoyat kodeksining 97-modda (qasddan odam o‘ldirish) 2-qismi bo‘yicha to‘plangan ishi uning advokati tomonidan keltirilgan apellyatsiya arizasiga ko‘ra ko‘rib chiqilgan.
Apellyatsiyada fuqaro E.O‘. sobiq o‘rtog‘ini qasddan o‘ldirmagani keltirilgan.
Mazkur ish Qoraqalpog‘iston Respublikasi Sudlov kollegiyasi tomonidan ko‘rib chiqilib, birinchi instansiya sudi tarafidan E.O‘.ning harakatlari Jinoyat kodeksining 97-moddasi 2-qismi bilan noto‘g‘ri kvalifikatsiya qilingan deb hisoblangan. Shu bilan birga, uning ishi Jinoyat kodeksining 97-modda 1-qismi bilan qayta kvalifikatsiyalangan va E.O‘.ga nisbatan 13 yilga ozodlikdan mahrum etish jazosi tayinlangan.
Avvalroq Toshkent viloyatida alimentdan qarzi bor erkak tomonidan pichoqlangan ayolning ahvoli haqida ma’lumot berilgani, Namanganda 3 nafar turmush o‘rtog‘idan ajrashgan va 5 nafar farzandining alimentlarini to‘lamay kelayotgan ota yarim yilga qamalgani, Qashqadaryoda aliment qarzdorligini undirishga kelgan MIB xodimini temir bo‘lagi bilan urgan shaxsga jinoyat ishi qo‘zg‘atilgani to‘g‘risida xabar berilgandi.
Izoh (0)