Ўзбекистонда вакцина олиши кўзда тутилган аҳолининг 55 фоизи тўлиқ эмланди

11 декабрь ҳолатига кўра, Ўзбекистонда эмланиши кўзда тутилган аҳолининг 55 фоизи коронавирусга қарши тўлиқ эмланди, деб хабар беради ССВ матбуот хизмати.

Таъкидланишича, умумий ҳисобда тўлиқ эмлаш курсларини олган фуқаролар сони 11 797 635 нафарни ташкил қилмоқда.

Шундан:

• 793 431 нафари 65 ёшдан ошганлар,
• 421 017 нафари тиббиёт ходимлари,
• 420 552 нафари мактаб ўқитувчилари,
• 164 466 нафари мактабгача таълим ташкилотлари ходимлари,
• 782 182 нафари сурункали касаллиги бор фуқаролардир. Қолган вакциналар аҳолининг бошқа қатламларини эмлаш учун қўлланилган.

Бундан аввал Ўзбекистонга Pfizer вакцинасининг 301 860 дозалик партияси олиб келингани, Ўзбекистонда фойдаланилган вакциналар сони 35 млн дозадан ошгани ҳамда Ўзбекистонда коронавирусга қарши бустер доза билан эмлаш бошлангани ҳақида хабар берилганди.

Маълумот учун, мамлакатда аҳолини коронавирусга қарши эмлаш тадбирлари 1 апрелдан бошланди. Эмлаш ихтиёрий ва бепул, февраль ойида вакцина олишдан бош тортганларга ҳеч қандай чора кўрилмаслиги айтилганди. Июнь охиридан бошлаб эса Тошкентда 18 ёшдан ошганлар коронавирусга қарши оммавий эмлаш бошланган. 28 сентябрдан 12 ёшдан катта болаларни ҳам коронавирусга қарши Pfizer вакцинаси билан ихтиёрий равишда эмлашга рухсат берилганди.

Эслатиб ўтамиз, июль ўрталарида Ўзбекистонда 18 ёшдан ошган 14 та тоифадаги фуқаролар коронавирусга қарши эмланиши шарт этиб белгиланди. Улар орасида аҳоли билан мулоқотга кирувчи барча турдаги хизмат кўрсатиш объектларининг (давлат хизматлари марказлари, почта бўлинмалари, банклар, лизинг ташкилотлари, нотариуслар, суғурта компаниялари, гўзаллик салонлари, сартарошхоналар ва бошқаларнинг) ходимлари ҳам бор.