O‘zbekistonda 12 yoshdan katta bolalarni ham koronavirusga qarshi Pfizer vaksinasi bilan emlashga ruxsat berildi
O‘zbekistonda 12 yoshdan katta bolalar ham koronavirusga qarshi Pfizer vaksinasi bilan ixtiyoriy ravishda emlanishga ruxsat berildi. Bu haqda Sog‘liqni saqlash vazirligi xabar berdi.
Ta’kidlanishicha, koronavirusga qarshi Pfizer vaksinasining 12-15 yoshdagi bolalarda o‘tkazilgan klinik sinovlarining natijalari mazkur vaksinaning yuqori darajada samaradorligi va xavfsizligini ko‘rsatgan.
“Jahon sog‘liqni saqlash tashkiloti tomonidan 12 yoshdan yuqori bolalarni va o‘smirlarni Pfizer vaksinasi bilan emlash tavsiya etildi. O‘zbekiston Bosh davlat sanitariya vrachi va milliy texnik immunologik ekspert komissiyasining qaroriga asosan, yurtimizda ota-onalar va vasiylarining roziligi asosida, ixtiyoriy ravishda 12 yoshdan katta bolalarni Pfizer vaksinasi bilan emlash imkoniyati mavjud”, — deyiladi xabarda.
Eslatib o‘tamiz, 13-sentabr kuni O‘zbekistonga 1,2 million doza Pfizer/BioNTech vaksinasi olib kelingan edi.
Ma’lumot uchun, mamlakatda aholini koronavirusga qarshi emlash tadbirlari 1-apreldan boshlandi. Emlash ixtiyoriy va bepul, vaksina olishdan bosh tortganlarga hech qanday chora ko‘rilmaydi. Iyun oxiridan boshlab esa Toshkentda 18 yoshdan oshganlar koronavirusga qarshi ommaviy emlash boshlangandi.
