Toshkentning Chilonzor tumanida ikki ayol profilaktika inspektori bilan janjallashgani aks etgan video tarqalgandi. Poytaxt IIBB mazkur holat yuzasidan xizmat tekshiruvi o‘tkazilgani, ayollar va profilaktika inspektorlari harakatlariga qonuniy baho berish uchun Chilonzor tumani prokuraturasiga yuborilganini ma’lum qilgandi. Tuman hokimligi matbuot xizmati holat yuzasidan batafsil ma’lumot berdi.
Eslatib o‘tamiz, tarqalgan videoda ayollardan biri profilaktika inspektorlarini haqoratlab, asossiz majburlab, IIBga olib kelinganini aytgani, so‘ng stoldagi qog‘ozlarni yirtib, xonadagi buyumlarni inspektorga otib tashlagani tasvirlangan. Video izohida janjallashayotgan ayollar qaysidir sudyaning uyida ishchi bo‘lib ishlashi, ularni qo‘lga olgan mahalla inspektorlari esa qamoqda ushlanayotgani aytilgan.
Bundan tashqari, holatga aloqador inspektor kapitan I.M.ning onasi videomurojaat bilan chiqib, mazkur voqeadan so‘ng, uning farzandini qamab qo‘yishganini, yordam so‘rab qilgan murojaatlari javobsiz qolayotganini ma’lum qilgan.
Chilonzor tumani prokuraturasi mas’ullarining xabar berishicha, haqiqatan ham 2021-yil 27-sentabrda ayollar X.Sh. va N.S. 9-avgust kuni soat 02:15 larda o‘zlari istiqomat qiladigan manzilga kirayotganida Chilonzor tuman IIO FMB xodimlari ularni to‘xtatib, asossiz ayblab, haqoratlab, majburlab, 3-sonli IIB tayanch punktiga olib borgan.
Tayanch punktida ularni sha’ni va qadr-qimmatini tahqirlab, qo‘llariga kishan solib, urib tan jarohatlari yetkazib, bir necha soatlar ushlab turib, kameraga qamab, ularga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) 1-qismi bilan asossiz ravishda ma’muriy huquqbuzarlikka doir ish yuritib, to‘plangan hujjatlarni Jinoyat ishlari bo‘yicha Chilonzor tumani sudiga yuborgan.
Shunga asosan Chilonzor tuman IIO FMB xodimlariga nisbatan Jinoyat kodeksining 206-moddasi (hokimiyat yoki mansab vakolati doirasidan chetga chiqish) 1-qismi va 209-moddasi (mansab soxtakorligi) bilan jinoyat ishi qo‘zg‘atilgan.
Mazkur holat yuzasidan Toshkent shahar IIBB Shaxsiy xavfsizlik boshqarmasi tomonidan 20-oktabrda o‘tkazilgan xizmat tekshiruvi xulosasiga ko‘ra, Chilonzor tuman IIO FMB 3-son IIB HPB profilaktika inspektorlari egallab turgan lavozimidan ozod etilgan.
7-dekabr kuni Chilonzor tuman IIO FMB 3-son IIB HPB profilaktika inspektorlari Jinoyat kodeksining 206-moddasi 1-qismi, 234-moddasi (qonunga xilof ravishda ushlab turish yoki hibsga olish) 2-qismi va 235-moddasi (qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) 2-qismi “v” bandi bilan ayblanuvchi tariqasida ishtirok etishga jalb qilinib, ularga nisbatan qamoqqa olish tarzidagi ehtiyot chorasi qo‘llanilgan.
Xabarda aytilishicha, hozirda jinoyat ishi yuzasidan tergov harakatlari olib borilmoqda, mazkur ish bo‘yicha sud qarori chiqarilgandan so‘ng, yana qo‘shimcha ma’lumotlar taqdim etiladi.
Izoh (0)