O‘zbekistonda ijarada turuvchi talabalarda soliq majburiyati yuzaga kelmaydi — Davlat soliq qo‘mitasi

O‘zbekistonda turar joylarni ijaraga oluvchi talabalarda soliq majburiyati yuzaga kelmaydi, deb xabar beradi Davlat soliq qo‘mitasi matbuot xizmati.

Qo‘mita ijtimoiy tarmoqlarda jismoniy shaxslar tomonidan talabalarga turar joylarini ijaraga berishdan olingan daromadlari bo‘yicha to‘lanadigan daromad solig‘ini talabalar zimmasiga yuklayotgani aytilgan xabarlarga munosabat bildirgan.

Ma’lum qilinishicha, ko‘chmas mulk obyektlarini talabalarga ijaraga berishda daromad oluvchi mulk egasi bo‘lib, Soliq kodeksining 375-moddasiga (mulkiy daromadlar) muvofiq bunday daromad jismoniy shaxslarning mulkiy daromadlari hisoblanadi.

Ta’kidlanishicha, Davlat soliq qo‘mitasi tomonidan talabalar va turar joyini ijaraga beradigan fuqarolar uchun qulayliklar yaratish maqsadida Vazirlar Mahkamasining 2021-yil 22-sentabrdagi 595-son qaroriga asosan ijara shartnomalarini elektron hisobga qo‘yish uchun “Ijara.soliq.uz” elektron xizmati ishlab chiqilgan.

Mazkur elektron xizmat tizimi Oliy va o‘rta-maxsus ta’lim vazirligi ma’lumotlar bazasi bilan integratsiya qilinib, talabalarning barcha ma’lumotlari avtomatik ravishda shakllantiriladi hamda ko‘chmas mulk obyektlarini talabalarga ijaraga berayotgan jismoniy shaxslarning olgan daromadlarini soliqdan ozod qilinishi ham avtomatik tarzda amalga oshirilishi nazarda tutilgan.

Ushbu xizmat turi test sinovlaridan muvaffaqiyatli o‘tkazilgan va 2022-yil 1-yanvardan to‘liq ishga tushiriladi.

Eslatib o‘tamiz, Shavkat Mirziyoyev 2021-yilning aprel oyida ijarada yashayotgan talabalarga 1-maydan boshlab ijara to‘lovining yarmi davlat tomonidan qoplab berilishini aytgandi. Keyinchalik ijara to‘lovi xarajatlarining 50 foizi BHMning bir baravaridan oshmagan taqdirda to‘lab berilishi ma’lum bo‘lgan. Sentabr oyida talabalarga ijara to‘lovining bir qismini qoplab berish tartibi belgilangan.