Toshkent shahar hokimligi “Qo‘yliq” dehqon bozori yo‘l kengaytirilishi sabab boshqa joyga ko‘chirilishini ma’lum qilgandi. Bunday qaror hukumat tomonidan 2017-yildayoq qabul qilingan, deb xabar bermoqda Vazirlar Mahkamasining tegishli farmoyishi bilan tanishib chiqqan “Gazeta.uz”.
Poytaxtning eng yirik bozorlaridan biri ko‘chirilishi haqidagi xabarlar tarqalganiga bir necha kun bo‘ldi (ko‘chirish to‘g‘risidagi xabarlar bir necha yil avval ham tilga olingan). Shahar hokimligi bunday qaror Toshkent halqa yo‘lini kengaytirish va uning ustidan o‘tadigan chorrahalarni keng ko‘lamli rekonstruksiya qilish rejalari bilan bog‘liqligini ma’lum qilib, tez fursatlarda loyiha haqida batafsil ma’lumot berishni bildirdi.
“Qo‘yliq” bozori qayerga ko‘chiriladi?
Food City vakilining “Gazeta.uz”ga ma’lum qilishicha, xalqaro tajriba o‘rganilgach, bozorni poytaxt tashqarisiga o‘tkazish to‘g‘risidagi qaror qabul qilingan.
“Agar xalqaro tajribaga qaraydigan bo‘lsak, unda barcha bozorlar shahar tashqarisida joylashganini ko‘rishimiz mumkin. ‘Qo‘yliq’ — bu oziq-ovqat mahsulotlarini Toshkent bo‘ylab taqsimlovchi markaz. Ko‘plab kichik do‘konlar bu yerda mahsulot xarid qiladi va ularni uylar oldidagi do‘konlarda sotadi. Transport oqimining ko‘pligi esa yo‘llarda tirbandliklar hosil bo‘lishiga sabab bo‘ladi”, — deb ta’kidlagan kompaniya vakili.
U, shuningdek, “Qo‘yliq” bozorida ishlaydiganlar yangi bozorda joy ajratishda ustuvorlikka egaligini, ularga poytaxt hokimligi tomonidan savdo joyi uchun o‘rnatiladigan ijara pulidan 80 foizlik chegirma taqdim etilishini bildirgan.
“Kun.uz”ning yozishicha, savdo markazidagi do‘konlar iyul oyidan boshlab ijara sifatida taklif etila boshlangan. Ijara puli 50 milliondan 100 million so‘mgachani tashkil qilgan. Majmua vakili esa bu boshlang‘ich narx ekanligini, 100 million so‘mdan ko‘proq mablag‘ garov sifatida talab etilishi, oylik ijara puli esa 3,5 million so‘mni tashkil etishini aytgan.
Food City vakilining “Gazeta.uz”ga ma’lum qilishicha, yangi bozordan uzoqroqda istiqomat qiluvchi iste’molchilar, shu jumladan, eng yaqin metro bekatlaridan bepul avtobus yo‘nalishlarini joriy etish rejalashtirilgan. Hozirda harakatlanish sxemasi ishlab chiqilmoqda va zarur avtobuslar soni aniqlashtirilmoqda.
Food City ma’lumotlariga ko‘ra, 20 ming kvadrat metr maydonni egallagan savdo bozori haftasiga 7 kun, 24 soat davomida ishlaydi.
Hukumat farmoyishida nimalar qayd etilgan?
“Gazeta.uz” o‘rganib chiqqan Vazirlar Mahkamasining 2017-yildagi farmoyishida “Bektemir Nur agro” va “Tursunov Ulug‘bek agro” fermer xo‘jaliklariga qarashli bo‘lgan 55 gektar maydonni qishloq xo‘jaligi mahsulotlarini qayta ishlash va saqlash korxonasi, dehqon (oziq-ovqat) bozori, qishloq xo‘jaligi mahsulotlari ulgurji savdosi majmuasi, yirik savdo majmuasi (gipermarket), shuningdek, avtomobil to‘xtash joyi va avtobus bekati qurilishi uchun ajratish nazarda tutilgan.
Majmuani qurish taklifi Toshkent viloyati hokimligi, Davlat soliq qo‘mitasi va “Toshkentvino” kombinati tomonidan bildirilgan.
Qurilish maqsadlari sifatida “Toshkent shahri aholisini qishloq xo‘jaligi mahsulotlari bilan uzluksiz ta’minlash, zamonaviy talablarga javob beradigan qulayliklar yaratish va xizmatlar ko‘rsatish, ushbu faoliyat bilan shug‘ullanuvchi fermer xo‘jaliklari va tadbirkorlarga qishloq xo‘jaligi mahsulotlarini respublikaning boshqa hududlaridan tez va arzon yetkazib berish, shuningdek, qishloq xo‘jaligi mahsulotlarini qayta ishlash, saqlash va eksport qilish hajmini oshirish” ko‘rsatilgan.
Yangi majmuaning ochilishi 2019-yilga mo‘ljallangan edi. Qurilish buyurtmachisi sifatida “Toshkentvino” kombinati tanlangan, bosh pudratchi esa — “O‘zagrosanoatloyiha” hisoblanadi. Loyiha prezidentga ham taqdim etilgan.
Farmoyishda qayd etilishicha, qurilish ishlari yakunlangach, savdo bilan shug‘ullanuvchi va “Qo‘yliq” dehqon bozori hududida xizmat ko‘rsatuvchi xo‘jalik yurituvchi subyektlar va fuqarolar (fermer va dehqon xo‘jaliklari) yangi kompleksga ko‘chiriladi.
Korxona va tashkilotlarning yagona davlat reyestri ochiq ma’lumotlariga ko‘ra, Food City’ga 2017-yil 5-dekabrda Toshkent viloyati O‘rtachirchiq tumanida tashkil etilgan Food City Tashkent egalik qiladi. Asosiy faoliyat turi — noturar joylar boshqaruvi va ijarasi hisoblanadi.
Uning ta’sischilari qatoridan Procab (60,7 foiz), “Trastbank” kompaniyasi Trast Leasing (26 foiz) va “Toshkentvino” (13,3 foiz) o‘rin olgan. Rahbari esa Dilshod Xabibullayevich Samigov.
Procab kabel va sim mahsulotlarini ishlab chiqaruvchi kompaniyaning 47,8 foiz ulushi Inter Alltech Limited Kompaniyasi‘ga tegishli (Google orqali qidiruvlar “Alltek” Rossiya kompaniyalar guruhiga qarashli ekanini ko‘rsatmoqda). 26,1 foiz ulushga Dilmurodjon Batirovich Parpiyev egalik qilsa (otasining ismi va familiyasi DSQning sobiq rahbari Botir Parpiyevning ism va familiyasi bilan bir xil), qolgan 26,1 foiz ulush Toxir Miraximovich Sharipovga qarashli.
Dilmurod Parpiyev va Tozir Sharipov shuningdek, Inco-Construction (Inco kompaniyalar guruhi), Alutex, Inco Invest, Furnir va Presystem Universal kompaniyalarida teng (50 foiz) ulushlarga ega.
“Toshkentvino”ning eng yirik aksiyadorlari qatoridan — 31,4 foiz ulush bilan Buyuk Britaniyaning Virjiniya orollaridagi Fruit Industrials S.A. kompaniyasi o‘rin olgan.
Sotuvchilar noroziligi
Ijtimoiy tarmoqlarda Qo‘yliqdagi dehqon bozori va ulgurji bozor yaqinidagi avtomobil yo‘lini odamlar “jonli devor” hosil qilib to‘sishga urinayotgani aks etgan videoyozuvlar tarqaldi. Videoga olayotgan shaxsning izohiga ko‘ra, odamlar “Qo‘yliq” bozori yo‘l kengaytirilishi va yo‘l o‘tkazgich qurilishi munosabati bilan buzilishga tushgani va bozor hududiga kirish yopib qo‘yilganidan norozilik bildirib, yo‘lni to‘sishga chiqqan.
“Daryo” vaziyat yuzasidan izoh olish maqsadida Toshkent shahar hokimligi, O‘zbekiston Ichki ishlar vazirligi hamda Toshkent shahar IIBB matbuot xizmatlariga murojaat qildi. Hokimlik matbuot xizmati so‘rovlarga javob bermagan bo‘lsa, huquq-tartibot organlari vakillari “vaziyat bo‘yicha ish olib borilayotgani”ni, yaqin vaqt ichida rasmiy izoh berilishini ma’lum qildi.
Izoh (0)