Markaziy bank O‘zbekistonga 2021-yilning yanvar—noyabr oylarida xorijdan yuborilgan pul o‘tkazmalari hajmi 7,3 milliard dollarni tashkil etganini ma’lum qildi.
Qayd etilishicha, pul o‘tkazmalari hajmi 2020-yilning mos davriga nisbatan 35 foizga o‘sgan. Bu aholining iste’mol talabini qo‘llab-quvvatlovchi omillardan bo‘lgan.
Yevropa tiklanish va taraqqiyot banki O‘zbekistonda yalpi ichki mahsulot o‘sishi borasidagi prognozlarini oshirgandi. Unga ko‘ra, YaIM 2021-yilda 6,8 foizga, 2022-yilda esa 6 foizga o‘sadi. Prognoz qilinayotgan o‘sish xususiy iste’mol va pul o‘tkazmalarining ko‘payishi hamda aksariyat qismi tashqi qarzlar hisobidan moliyalashtiriladigan infratuzilmaga investitsiyalarning ortishi hisobiga ta’minlanadi.
Belgilanishicha, O‘zbekistonga mehnat migrantlarining pul o‘tkazmalari hajmi 2021-yil yakuniga kelib qariyb 7,6 milliard dollarni tashkil etishi kutilmoqda. Taqqoslash uchun, 2020-yil davomida migrantlar O‘zbekistonga 6 milliard dollar o‘tkazgan.
Eslatib o‘tamiz, O‘zbekistonga 2021-yilning yanvar—sentabr oylarida xorijdan yuborilgan pul o‘tkazmalari hajmi 5,7 milliard dollarni tashkil etgandi.
Izoh (0)