Тошкент шаҳар ҳокимлиги «Қўйлиқ» деҳқон бозори йўл кенгайтирилиши сабаб бошқа жойга кўчирилишини маълум қилганди. Бундай қарор ҳукумат томонидан 2017 йилдаёқ қабул қилинган, деб хабар бермоқда Вазирлар Маҳкамасининг тегишли фармойиши билан танишиб чиққан «Gazeta.uz».
Пойтахтнинг энг йирик бозорларидан бири кўчирилиши ҳақидаги хабарлар тарқалганига бир неча кун бўлди (кўчириш тўғрисидаги хабарлар бир неча йил аввал ҳам тилга олинган). Шаҳар ҳокимлиги бундай қарор Тошкент ҳалқа йўлини кенгайтириш ва унинг устидан ўтадиган чорраҳаларни кенг кўламли реконструкция қилиш режалари билан боғлиқлигини маълум қилиб, тез фурсатларда лойиҳа ҳақида батафсил маълумот беришни билдирди.
«Қўйлиқ» бозори қаерга кўчирилади?
9 декабрь куни бозор Қўйлиқдан 6,5 километр узоқликда, Тошкент вилоятида жойлашган Food City савдо мажмуасига кўчирилиши ҳақида хабарлар тарқалди. У мамлакатдаги биринчи қишлоқ хўжалиги кластери ва замонавий савдо майдончаси ҳисобланади.
Food City вакилининг «Gazeta.uz»га маълум қилишича, халқаро тажриба ўрганилгач, бозорни пойтахт ташқарисига ўтказиш тўғрисидаги қарор қабул қилинган.
«Агар халқаро тажрибага қарайдиган бўлсак, унда барча бозорлар шаҳар ташқарисида жойлашганини кўришимиз мумкин. ‘Қўйлиқ’ — бу озиқ-овқат маҳсулотларини Тошкент бўйлаб тақсимловчи марказ. Кўплаб кичик дўконлар бу ерда маҳсулот харид қилади ва уларни уйлар олдидаги дўконларда сотади. Транспорт оқимининг кўплиги эса йўлларда тирбандликлар ҳосил бўлишига сабаб бўлади», — деб таъкидлаган компания вакили.
У, шунингдек, «Қўйлиқ» бозорида ишлайдиганлар янги бозорда жой ажратишда устуворликка эгалигини, уларга пойтахт ҳокимлиги томонидан савдо жойи учун ўрнатиладиган ижара пулидан 80 фоизлик чегирма тақдим этилишини билдирган.
«Kun.uz»нинг ёзишича, савдо марказидаги дўконлар июль ойидан бошлаб ижара сифатида таклиф этила бошланган. Ижара пули 50 миллиондан 100 миллион сўмгачани ташкил қилган. Мажмуа вакили эса бу бошланғич нарх эканлигини, 100 миллион сўмдан кўпроқ маблағ гаров сифатида талаб этилиши, ойлик ижара пули эса 3,5 миллион сўмни ташкил этишини айтган.
Food City вакилининг «Gazeta.uz»га маълум қилишича, янги бозордан узоқроқда истиқомат қилувчи истеъмолчилар, шу жумладан, энг яқин метро бекатларидан бепул автобус йўналишларини жорий этиш режалаштирилган. Ҳозирда ҳаракатланиш схемаси ишлаб чиқилмоқда ва зарур автобуслар сони аниқлаштирилмоқда.
Food City маълумотларига кўра, 20 минг квадрат метр майдонни эгаллаган савдо бозори ҳафтасига 7 кун, 24 соат давомида ишлайди.
Ҳукумат фармойишида нималар қайд этилган?
«Gazeta.uz» ўрганиб чиққан Вазирлар Маҳкамасининг 2017 йилдаги фармойишида «Бектемир Нур агро» ва «Турсунов Улуғбек агро» фермер хўжаликларига қарашли бўлган 55 гектар майдонни қишлоқ хўжалиги маҳсулотларини қайта ишлаш ва сақлаш корхонаси, деҳқон (озиқ-овқат) бозори, қишлоқ хўжалиги маҳсулотлари улгуржи савдоси мажмуаси, йирик савдо мажмуаси (гипермаркет), шунингдек, автомобиль тўхташ жойи ва автобус бекати қурилиши учун ажратиш назарда тутилган.
Мажмуани қуриш таклифи Тошкент вилояти ҳокимлиги, Давлат солиқ қўмитаси ва «Тошкентвино» комбинати томонидан билдирилган.
Қурилиш мақсадлари сифатида «Тошкент шаҳри аҳолисини қишлоқ хўжалиги маҳсулотлари билан узлуксиз таъминлаш, замонавий талабларга жавоб берадиган қулайликлар яратиш ва хизматлар кўрсатиш, ушбу фаолият билан шуғулланувчи фермер хўжаликлари ва тадбиркорларга қишлоқ хўжалиги маҳсулотларини республиканинг бошқа ҳудудларидан тез ва арзон етказиб бериш, шунингдек, қишлоқ хўжалиги маҳсулотларини қайта ишлаш, сақлаш ва экспорт қилиш ҳажмини ошириш» кўрсатилган.
Янги мажмуанинг очилиши 2019 йилга мўлжалланган эди. Қурилиш буюртмачиси сифатида «Тошкентвино» комбинати танланган, бош пудратчи эса — «Ўзагросаноатлойиҳа» ҳисобланади. Лойиҳа президентга ҳам тақдим этилган.
Фармойишда қайд этилишича, қурилиш ишлари якунлангач, савдо билан шуғулланувчи ва «Қўйлиқ» деҳқон бозори ҳудудида хизмат кўрсатувчи хўжалик юритувчи субъектлар ва фуқаролар (фермер ва деҳқон хўжаликлари) янги комплексга кўчирилади.
Корхона ва ташкилотларнинг ягона давлат реестри очиқ маълумотларига кўра, Food City’га 2017 йил 5 декабрда Тошкент вилояти Ўртачирчиқ туманида ташкил этилган Food City Tashkent эгалик қилади. Асосий фаолият тури — нотурар жойлар бошқаруви ва ижараси ҳисобланади.
Унинг таъсисчилари қаторидан Procab (60,7 фоиз), «Trastбанк» компанияси Trast Leasing (26 фоиз) ва «Тошкентвино» (13,3 фоиз) ўрин олган. Раҳбари эса Дилшод Хабибуллаевич Самигов.
Procab кабел ва сим маҳсулотларини ишлаб чиқарувчи компаниянинг 47,8 фоиз улуши Inter Alltech Limited Компаниясиъга тегишли (Google орқали қидирувлар «Аллтек» Россия компаниялар гуруҳига қарашли эканини кўрсатмоқда). 26,1 фоиз улушга Дилмуроджон Батирович Парпиев эгалик қилса (отасининг исми ва фамилияси ДСҚнинг собиқ раҳбари Ботир Парпиевнинг исм ва фамилияси билан бир хил), қолган 26,1 фоиз улуш Тохир Мирахимович Шариповга қарашли.
Дилмурод Парпиев ва Тозир Шарипов шунингдек, Inco-Construction (Inco компаниялар гуруҳи), Alutex, Inco Invest, Furnir ва Presystem Universal компанияларида тенг (50 фоиз) улушларга эга.
«Тошкентвино»нинг энг йирик акциядорлари қаторидан — 31,4 фоиз улуш билан Буюк Британиянинг Виржиния оролларидаги Fruit Industrials S.A. компанияси ўрин олган.
Сотувчилар норозилиги
Ижтимоий тармоқларда Қўйлиқдаги деҳқон бозори ва улгуржи бозор яқинидаги автомобиль йўлини одамлар «жонли девор» ҳосил қилиб тўсишга уринаётгани акс этган видеоёзувлар тарқалди. Видеога олаётган шахснинг изоҳига кўра, одамлар «Қўйлиқ» бозори йўл кенгайтирилиши ва йўл ўтказгич қурилиши муносабати билан бузилишга тушгани ва бозор ҳудудига кириш ёпиб қўйилганидан норозилик билдириб, йўлни тўсишга чиққан.
«Дарё» вазият юзасидан изоҳ олиш мақсадида Тошкент шаҳар ҳокимлиги, Ўзбекистон Ички ишлар вазирлиги ҳамда Тошкент шаҳар ИИББ матбуот хизматларига мурожаат қилди. Ҳокимлик матбуот хизмати сўровларга жавоб бермаган бўлса, ҳуқуқ-тартибот органлари вакиллари «вазият бўйича иш олиб борилаётгани»ни, яқин вақт ичида расмий изоҳ берилишини маълум қилди.
Изоҳ (0)