Samarqand shahridagi choyxonalardan birida qimor o‘yinlari tashkil qilib kelinayotgani aniqlandi. Bu haqda “Daryo”ga Davlat xavfsizlik xizmati Samarqand viloyati boshqarmasi xabar qildi.
Ma’lum qilinishicha, Davlat xavfsizlik xizmati Samarqand viloyat boshqarmasi, viloyat Ichki ishlar boshqarmasi terrorizm va ekstremizmga qarshi kurashish boshqarmasi va shahar ichki ishlar organi xodimlari tomonidan 5-dekabr kuni tezkor tadbir o‘tkazilgan. Unda “Xumo” mahallasi hududida joylashgan choyxonada 17 nafar fuqaro qimor o‘yinlarini tashkil qilib, o‘ynab kelayotgani aniqlangan.
Olib borilgan surishtiruvlar natijasida o‘yinni shu mahallada yashovchi X.O. (1958-yilda tug‘ilgan) tomonidan tashkil qilingani ma’lum bo‘lgan.
Qayd etilishicha, voqea joyini ko‘zdan kechirish davomida qimor o‘yini uchun tikilgan 718 ming so‘m pul, 100 dona karta kalodalari topilgan.
Ta’kidlanishicha, holat yuzasidan tergovga qadar tekshiruv ishlari olib borilmoqda.
Bu Samarqand viloyatida qimorxona aniqlangani to‘g‘risidagi birinchi xabar emas. Avvalroq Samarqandda yashirin kazino tashkil etilgani aniqlanib, bir guruh kishilar ushlangani xabar qilingandi. Shuningdek, xuddi shu viloyatda ijara uyini qimorxonaga aylantirgan 25 yoshli yigitga jinoyat ishi qo‘zg‘atilgani, viloyatning Payariq tumanida 43 yoshli erkak o‘z uyida qimorxona ochgani, Past Darg‘om tumanida yashash uyida qimorxona tashkil etgan 39 yoshli erkak qo‘lga tushgani, Samarqand shahrida chilimxonadagi qimorxona fosh etilgani ma’lum bo‘lgan.
Izoh (0)