2016 йилги сайловларда АҚШ президентлигига номзодини қўйган Ҳиллари Клинтон, агар ўша пайт ғалаба қозонганида сўзламоқчи бўлган 16 дақиқалик нутқини эълон қилди, деб ёзади Meduza.
Тўлиқ стенограмма Клинтоннинг MasterClass онлайн платформаси обуначилари учун очиқ бўлган «Матонат кучи» маърузасига киритилади. Ушбу платформага ўз маҳорат сирлари билан ўртоқлашадиган машҳурларнинг видео-дарслари жойланади.
Маърузадан бир кун олдин эълон қилинган превьюда Клинтоннинг айтишича, шу пайтгача у ўз нутқини ҳеч кимга кўрсатмаган, аммо энди одамлар унинг кимлигини, нимага ишонишини, авлодлари ва бутун дунё учун нимани исташини яхшироқ тушуниши учун уни тақдим этишга қарор қилган.
Клинтон сайловдаги ғалабасини «барча америкаликларнинг, эркак-аёллар, ўғил-қизларнинг ғалабаси» деб эълон қилмоқчи эди, чунки бу ғалаба АҚШда инсонларга ҳеч қандай тўсиқ йўқлигини яна бир бор исботлаган бўларди.
«Ватандошим америкаликлар, бугун сиз бутун дунёга хабар юбордингиз. Қадриятларимиз букилмас, демократиямиз кучли, шиоримиз эса E pluribus unum — Кўпчиликдан ташкил топган бирлик бўлиб қолади. Бизни белгилайдиган жиҳат фақатгина бошқалардан ажралиб туриш эмас. Биз ‘ҳаммага қаршимиз’ принципи бўйича яшайдиган мамлакат бўлмаймиз. Америка орзуси ҳаммага етади», — дейилади Клинтоннинг нутқида.
АҚШ тарихидаги биринчи аёл президент бўлиши мумкин бўлган Клинтон ўзининг ғолиблик нутқида «Америкада ҳар бир ўғил, ҳар бир қиз улғайганида ўзи хоҳлаган инсонга, ҳаттоки АҚШ президентига айланиши мумкинлигини энди бутун дунё билади» демоқчи эди. У саккиз ёшида ота-онаси томонидан ташлаб кетилган ва қашшоқликда ўсган онаси Дороти Родҳам ҳақида ҳам гапирган. Онаси 2011 йилда 92 ёшида вафот этган.
«Унинг болалик кунларига қайтишни, унинг олдига бориб, ёнига ўтириб, қўлидан ушлаганча шундай дейишни орзу қиламан: Менга қара. Қулоқ сол. Сен яшайсан. Ажойиб оиланг ва уч нафар фарзандинг бўлади. Тасаввур қилиш қанчалик қийин бўлмасин, қизинг улғайганда, АҚШ президенти бўлади», — дейди Клинтон.
2016 йилда Клинтон президентлик сайловларида сўзсиз фаворит ҳисобланган, бироқ Дональд Трамп кутилмаганда ғалаба қозонган эди. Ўшанда сўнгисўз сифатида гапириши керак бўлган нутқида Клинтон Трампнинг «бутун мамлакат президенти» бўлишига умид билдирганди.
Ўша пайтда Клинтон сайловда ғалаба қозонмагани учун узр сўраган ҳамда америкаликлар қонун устуворлиги ва унинг олдида ҳамма тенглигини ҳимоялаши зарурлиги таъкидлаган. «Энди эса буни томоша қилаётган барча қизларга айтар сўзим: ҳеч қачон ўз қадр-қимматингизга шубҳа қилманг, сиз ўз орзуларингизга эришиш учун барча имкониятларга лойиқсиз», — дея 2016 йилдаги нутқини якунлаган Клинтон.
Изоҳ (0)