Agar yaqin kelajakda yadroviy kelishuv bo‘yicha muzokaralar muvaffaqiyatsizlikka uchrasa, AQSh Eronning daromad manbalarini cheklash choralarini ko‘radi. Bu haqda Oq uy matbuot kotibi Jen Psakining bayonotiga tayanib, “Kommersant” xabar berdi.
Brifing chog‘ida AQSh Oq uyining vakili “yadroviy inqirozdan qochishning eng yaxshi usuli” diplomatiya ekanini aytdi. “Ammo bu yondashuv muvaffaqiyatsizlikka uchragan taqdirda, qo‘llash uchun Jo Bayden AQSh ma’muriyatidan boshqa choralar tayyorlashni so‘radi”, — dedi Psaki xonim.
“Agar diplomatiya yaqin kunlarda zarur yo‘lga qaytishga yordam bermasa va Eron yadroviy dasturining rivojlanishi jadallashishda davom etsa, Eronning daromad keltiruvchi tarmoqlarini (iqtisodini) yanada cheklash uchun qo‘shimcha choralar ko‘rishdan boshqa choramiz qolmaydi”, — dedi matbuot kotibi.
Yangi sanksiyalar aynan qaysi sohalarga kiritilishi mumkinligi haqidagi savolga Psaki javob bermadi.
Ushbu masalada fikr bildirgan Rossiya tashqi ishlar vaziri o‘rinbosari Sergey Ryabkovning aytishicha, yadroviy kelishuv bo‘yicha Qo‘shma harakatlar rejasi qachon tiklanishi hozircha noma’lum. Uning so‘zlariga ko‘ra, tomonlar qachon kelishuvga erisha olishiga “yaqin tushuncha ham mavjud emas”.
Diplomat, shuningdek, Eronga qarshi sanksiyalarning kuchaytirilishi AQSh uchun “o‘z oyog‘iga o‘q uzish” bo‘ladi, degan fikrda. “Tushunishimcha, amerikaliklar ularning muloqot va bosim uyg‘unligidan iborat siyosati hamma joyda, ularga mos keladigan barcha davlatlar bilan munosabatlarda o‘z samarasini berayotganiga qattiq ishonadi. Ammo bu ular o‘ylaganday emas”, — dedi Ryabkov.
Rossiya Tashqi ishlar vazirligining rasmiy bayonotida aytilishicha, 9-dekabr kuni Yadro dasturi bo‘yicha muzokaralarning barcha ishtirokchilari yadroviy bitimni tiklash uchun barcha sa’y-harakatlarni amalga oshirish niyatini tasdiqlagan. “Uchrashuv yakunlari bo‘yicha, jumladan, sanksiyalar va yadroviy masalalar bo‘yicha ishchi guruhlar doirasida ekspertlar darajasida intensiv hamkorlikni davom ettirishga qaror qilindi”, — deya qo‘shimcha qildi vazirlik.
AQSh ilgari ham agar Eron yadro dasturiga diplomatiya yo‘li bilan qaytmasa, boshqa choralar ko‘rishi mumkinligidan ogohlantirgan edi.
Avvalroq Eron yadro dasturi ishtirokchilariga yadroviy majburiyatlar va AQSh sanksiyalarini bekor qilish yuzasidan o‘z takliflarni topshirgani xabar qilingan.
Izoh (0)