Turkiya prezidenti Rajab Toyyib Erdo‘g‘on fuqarolarni sabrli bo‘lishga va hukumatining yangi iqtisodiy modeliga ishonishga chaqirdi. Bu haqda Reuters xabar berdi.
Vazirlar Mahkamasi yig‘ilishidan keyin nutq so‘zlagan Erdo‘g‘on Turkiyada narxlarning oshishiga mahalliy importchilar va chakana savdogarlarning “xasisligi” sabab bo‘lganini, vaziyat tez orada barqarorlashishini aytdi.
“Turkiyaning salohiyatini oldinga siljitishimiz kerak. Qayerga ketayotganimizni bilamiz, xalqimizdan sabrli bo‘lishini so‘rayman. Muvozanat topish uchun energiya ta’minoti va oziq-ovqat narxlarining pasayishiga ishonaman”, — dedi Erdo‘g‘on.
Uning qo‘shimcha qilishicha, hukumat zaxira yig‘ayotgan va tovarlar narxining oshishidan foydalanib qolmoqchi bo‘lgan shaxslarga “rahm-shafqat qilmaydi”.
Turkiya lirasining dollarga nisbatan kursi rekord darajada pasayishda davom etmoqda. Noyabr oyida turk valyutasi o‘z qiymatining qariyb 40 foizini yo‘qotdi, yil boshidan beri esa deyarli ikki baravar qadrsizlandi. Turkiyada stavkalarni pasaytirishning asosiy tarafdori — mamlakat prezidenti Rajab Toyyib Erdo‘g‘on. Past foiz stavkasi iqtisodiy o‘sishni rag‘batlantirishi tufayli Erdo‘g‘on uni qo‘llab-quvvatlaydi. Turkiya prezidenti shuningdek, bu inflyatsiyani ushlab turishga yordam beryapti, deb hisoblaydi, vaholanki bu fikr unchalik ham to‘g‘ri emas. Aksincha past foiz stavkasining hissasi bilan iqtisodiyot va daromadlarning o‘sishi aholini ko‘proq mablag‘ sarflashga undaydi, biznes esa talab o‘sib borayotgan sharoitda narxlarni oshiradi.
23-noyabr kuni valyuta kursining rekord darajada pasayishi ortidan yirik shaharlarda yuzlab odamlar ko‘chalarga chiqib, prezidentning iste’fosini talab qildi. Muxolifatchi partiyalar Erdo‘g‘onni layoqatsizlikda ayblab, muddatidan oldin saylov o‘tkazishni talab qilmoqda. Prezidentning o‘zi esa liraning qadrsizlanishida “tashqi kuchlar”ni ayblagan.
Erdo‘g‘on lira kursining rekord darajada tushib ketishi fonida Turkiya moliya vazirini almashtirdi.
Izoh (0)