Бутун дунё қамоқхоналарида сақланаётган журналистлар сони кетма-кет олтинчи йил рекорд даражага етди. Журналистларни ҳимоя қилиш қўмитаси (CPJ) маълумотларига кўра, 1 декабрь ҳолати бўйича улар 293 кишини ташкил этмоқда, деб ёзади «Коммерсантъ».
Қўмитада таъкидланишича, Хитой журналистлар учун энг катта қамоқхона бўлиб қолмоқда: мамлакатдаги панжаралар ортида 50 нафар журналист бор.
Иккинчи ўринда февралдаги ҳарбий тўнтаришдан кейин бир неча ўнлаб журналистлар ҳибсга олинган Мьянма (26 киши), учинчи ўринда Миср (25), тўртинчи ўринда Вьетнам (23) турибди. Юқори бешликка Беларусь ҳам кирган, мамлакат қамоқхоналарида 19 нафар журналист бор, мазкур рақамлар қўмита бундай маълумотларни йиғишни бошлаган 1992 йилдан бери Беларусь учун энг юқори кўрсаткичдир.
Россия бу рўйхатда саккизинчи ўринни эгаллади, 14 нафар россиялик журналист панжара ортида. CPJ маълумотларига кўра, Россия «раҳбарлари мухолифатни бостириш учун мунтазам равишда технология ва хавфсизлик қонунларидан фойдаланадиган» давлатлар қаторига киради.
Бундан ташқари, касбий фаолияти ортидан журналистларнинг ҳаётига қасд қилишлар давом этмоқда. CPJ хабар беришича, бу йил дунё бўйлаб 42 нафар журналист ҳалок бўлган, улардан 24 нафари мақолалари туфайли ўлдирилган. Қолганлари номаълум шароитларда вафот этган ва булар касбий фаолият учун қасддан содир этилган қотилликларми ёки йўқлигини аниқлашнинг иложи бўлмаган. Аксарият журналистлар Мексика, Ҳиндистон ва Афғонистонда ҳалок бўлган.
Изоҳ (0)