O‘zbekiston hududlarida “Yangi O‘zbekiston” massivlari qurilishi uchun 992 gektar yer maydoni tanlab olindi

Shavkat Mirziyoyev tashabbusi bilan qurilishi rejalashtirilgan “Yangi O‘zbekiston” massivlari uchun hududlar bo‘ylab yer maydonlari tanlab olindi. Bu haqda O‘zA xabar qildi.

Davlat rahbari 2-noyabr kuni bo‘lib o‘tgan videoselektor yig‘ilishida “Yangi O‘zbekiston” mavzelari qurilishini ma’lum qilgandi. “Aholining uy-joyga bo‘lgan talabini qondirish uchun kelgusi besh yilda yiliga 80 mingtadan xonadon qurishimiz zarur”, — degan edi prezident.

30-noyabr kuni esa Shavkat Mirziyoyev “Yangi O‘zbekiston” massivlari qurilishiga oid loyiha taqdimoti bilan tanishdi. Loyihaga ko‘ra, 2022-yilda 22 ta yangi massiv barpo etiladi, kichik sanoat zonasi, tadbirkorlik obyektlari tashkil etish orqali kamida 50 mingta ish o‘rni yaratiladi.

Ma’lum qilinishicha, hokimliklar bilan 30 ta massiv uchun 992 gektar yer maydoni tanlab olingan. Ularda ko‘p qavatli uylar, ijtimoiy soha, bozor infratuzilmasi va muhandislik obyektlarini joylashtirish bo‘yicha bosh reja loyihalari ishlab chiqilgan.

Loyihaga ko‘ra, 2022-yilda 2 ming 191 ta uy, jumladan, 56 ming xonadon, 27 ta maktab, 40 ta bog‘cha, 25 ta oilaviy poliklinika va 120 dan ortiq savdo-maishiy xizmat majmuasi qurish ko‘zda tutilgan. Hozirda yer ajratish, bosh reja va loyihalarni ishlab chiqish, buyurtmachi va pudratchilarni aniqlash, moliyalashtirish, ipoteka kreditlarini ajratish, metall va sement bilan ta’minlash, muhandislik kommunikatsiyalari va infratuzilma obyektlarini qurish masalalari hal etilmoqda.

Ta’kidlanishicha, uylar qurilishida reytingi 3 ta “S“dan yuqori pudrat tashkilotlari ishtirok etadi. Bugungi kunda bu kabi tashkilotlar soni 4 ming 876 tani tashkil etadi. Dastlabki bosqichda Toshkent shahri, Farg‘ona, Navoiy, Samarqand va Toshkent viloyatlarida klasterlar tashkil qilinadi. “Yangi O‘zbekiston” massivlari qurilishi uchun 2022-yilda 16 trillion so‘m ajratiladi.