Шавкат Мирзиёев ташаббуси билан қурилиши режалаштирилган «Янги Ўзбекистон» массивлари учун ҳудудлар бўйлаб ер майдонлари танлаб олинди. Бу ҳақда ЎзА хабар қилди.
Давлат раҳбари 2 ноябрь куни бўлиб ўтган видеоселектор йиғилишида «Янги Ўзбекистон» мавзелари қурилишини маълум қилганди. «Аҳолининг уй-жойга бўлган талабини қондириш учун келгуси беш йилда йилига 80 мингтадан хонадон қуришимиз зарур», — деган эди президент.
30 ноябрь куни эса Шавкат Мирзиёев «Янги Ўзбекистон» массивлари қурилишига оид лойиҳа тақдимоти билан танишди. Лойиҳага кўра, 2022 йилда 22 та янги массив барпо этилади, кичик саноат зонаси, тадбиркорлик объектлари ташкил этиш орқали камида 50 мингта иш ўрни яратилади.
Қайд этилишича, ҳозирда қурилиши режалаштирилган массивлар сони 22 тадан 29 тага кўпайган. Массивлар Фарғона вилояти Боғдод туманида қурилган «Мурувват» массиви намунасида барча ҳудудларда қурилади.Маълум қилинишича, ҳокимликлар билан 30 та массив учун 992 гектар ер майдони танлаб олинган. Уларда кўп қаватли уйлар, ижтимоий соҳа, бозор инфратузилмаси ва муҳандислик объектларини жойлаштириш бўйича бош режа лойиҳалари ишлаб чиқилган.
Лойиҳага кўра, 2022 йилда 2 минг 191 та уй, жумладан, 56 минг хонадон, 27 та мактаб, 40 та боғча, 25 та оилавий поликлиника ва 120 дан ортиқ савдо-маиший хизмат мажмуаси қуриш кўзда тутилган. Ҳозирда ер ажратиш, бош режа ва лойиҳаларни ишлаб чиқиш, буюртмачи ва пудратчиларни аниқлаш, молиялаштириш, ипотека кредитларини ажратиш, металл ва цемент билан таъминлаш, муҳандислик коммуникациялари ва инфратузилма объектларини қуриш масалалари ҳал этилмоқда.
Таъкидланишича, уйлар қурилишида рейтинги 3 та «С«дан юқори пудрат ташкилотлари иштирок этади. Бугунги кунда бу каби ташкилотлар сони 4 минг 876 тани ташкил этади. Дастлабки босқичда Тошкент шаҳри, Фарғона, Навоий, Самарқанд ва Тошкент вилоятларида кластерлар ташкил қилинади. «Янги Ўзбекистон» массивлари қурилиши учун 2022 йилда 16 триллион сўм ажратилади.
Изоҳ (0)